നീറ്റ് പുനഃപരീക്ഷ: 750 പേര്‍ ഹാജരായില്ല; 63 പേരെ ഡീബാര്‍ ചെയ്തു
ന്യൂഡല്‍ഹി: വിവാദമായതിനെ തുടര്‍ന്ന് വീണ്ടും നടത്തിയ നീറ്റ്-യു.ജി പരീക്ഷയില്‍ പങ്കെടുത്തത് 52 ശതമാനം വിദ്യാര്‍ഥികള്‍ മാത്രം.
602 പേര്‍ പരീക്ഷ എഴുതേണ്ടിയിരുന്ന ഛത്തീസ്ഗഢില്‍ 311 പേര്‍ ഹാജരായില്ല. 291 പേരാണ് പരീക്ഷയെഴുതിയത്. ഗുജറാത്തില്‍ നിന്നുള്ള ഏകവിദ്യാര്‍ഥി പരീക്ഷയെഴുതി. ഹരിയാണയിലെ 494 വിദ്യാര്‍ഥികളില്‍ 287 പേരാണ് പരീക്ഷയെഴുതിയത്. 207 പേര്‍ ഹാജരായില്ല. മേഘാലയയില്‍ 464 വിദ്യാര്‍ഥികളാണ് പരീക്ഷ എഴുതേണ്ടിയിരുന്നത്. ഇവരില്‍ 234 പേര്‍ ഹാജരായപ്പോള്‍ 230 പേര്‍ പരീക്ഷ എഴുതിയില്ല.
2024-ലെ മെഡിക്കല്‍ പ്രവേശനത്തിനായി മേയ് അഞ്ചിന് നടന്ന നീറ്റ്-യു.ജി. പരീക്ഷയിലെ ക്രമക്കേടുകളില്‍ സി.ബി.ഐ. എഫ്.ഐ.ആര്‍ രജിസ്റ്റര്‍ ചെയ്ത ദിവസമാണ് നീറ്റ് പുനഃപരീക്ഷ നടന്നത്. നീറ്റ് ചോദ്യപ്പേപ്പര്‍ ചോര്‍ച്ചയില്‍ അന്വേഷണം ആവശ്യപ്പെട്ട് വിദ്യാര്‍ഥികള്‍ നടത്തുന്ന പ്രക്ഷോഭത്തിനിടെയാണ് വിദ്യാഭ്യാസ മന്ത്രാലയത്തിന്റെ പരാതിയില്‍ സി.ബി.ഐ. എഫ്.ഐ.ആര്‍. രജിസ്റ്റര്‍ ചെയ്തത്.
