ജോലി ഓഫറുകൾ പിൻവലിച്ച 22 കമ്പനികളെ കാമ്പസ് പ്ലേസ്മെന്റുകളിൽ നിന്ന് വിലക്കും
2026-ലെ ബിരുദധാരികൾക്ക് നൽകിയ 150-ലധികം ജോലി വാഗ്ദാനങ്ങൾ കമ്പനികൾ പിൻവലിച്ചതിനെ തുടർന്ന്, അടുത്ത രണ്ട് സീസണുകളിലേക്ക് 22 കമ്പനികളെ കാമ്പസ് പ്ലേസ്മെന്റിൽ നിന്ന് വിലക്കാൻ ഓൾ ഐ.ഐ.ടി പ്ലേസ്മെന്റ് കമ്മിറ്റി തീരുമാനിച്ചതായി റിപ്പോർട്ട്. @IndianTechGuide എന്ന എക്സ് ഹാൻഡിലിൽ വന്ന ഒരു വൈറൽ പോസ്റ്റ് പ്രകാരമാണ് ഈ വിവരങ്ങൾ പുറത്തുവന്നത്.
വാഗ്ദാനം ചെയ്ത ജോലി നൽകാതെ വഞ്ചിച്ചതിനാണ് ഒറാക്കിൾ ഉൾപ്പെടെയുള്ള കമ്പനികളെ 23 ഐ.ഐ.ടികളിലെയും കാമ്പസ് റിക്രൂട്ട്മെന്റിൽ നിന്ന് ഒഴിവാക്കിയിരിക്കുന്നത്.
പല കമ്പനികളും 10 മുതൽ 15 വരെ ഓഫറുകൾ പിൻവലിച്ചപ്പോൾ, ഒറാക്കിൾ മാത്രം വിവിധ ഐ.ഐ.ടികളിലായി ഏകദേശം 40 ഓഫറുകളാണ് പിൻവലിച്ചത്. തൊഴിൽ വിപണിയിലേക്ക് പ്രവേശിക്കാൻ തയ്യാറെടുക്കുന്ന വിദ്യാർത്ഥികളെ സംബന്ധിച്ചിടത്തോളം വളരെ നിർണ്ണായകമായ ഒരു സമയത്താണ് ഈ നടപടി ഉണ്ടായിരിക്കുന്നത്. 23 സ്ഥാപനങ്ങളിലെയും പ്ലേസ്മെന്റ് പ്രവർത്തനങ്ങൾ ഏകോപിപ്പിക്കുന്ന ഓൾ ഐ.ഐ.ടി പ്ലേസ്മെന്റ് കമ്മിറ്റിയാണ് അടുത്ത രണ്ട് സീസണുകളിലേക്ക് ഈ കടുത്ത നടപടി സ്വീകരിച്ചിരിക്കുന്നത്.
ബാധിക്കപ്പെട്ട വിദ്യാർത്ഥികളുടെ ബയോഡാറ്റ മറ്റ് റിക്രൂട്ടർമാർക്ക് കൈമാറിയും ഇതര അവസരങ്ങൾ കണ്ടെത്താൻ സഹായിച്ചും പ്ലേസ്മെന്റ് ടീമുകൾ ഒപ്പം നിൽക്കുന്നുണ്ട്.
