12 വർഷം നീണ്ട കാത്തിരിപ്പ് അവസാനിച്ചു; ആപ്പിൾ പേ ഇന്ത്യയിൽ
യുഎസിൽ അവതരിപ്പിച്ച് 12 വർഷങ്ങൾക്ക് ശേഷം ആപ്പിൾ തങ്ങളുടെ പേയ്‌മെന്റ് സേവനമായ 'ആപ്പിൾ പേ' ഇന്ത്യയിൽ ഔദ്യോഗികമായി പുറത്തിറക്കിയിരിക്കുകയാണ്. തുടക്കത്തിൽ ആക്സിസ് ബാങ്ക് നൽകുന്ന വിസ, മാസ്റ്റർകാർഡ് ക്രെഡിറ്റ് കാർഡുകൾ മാത്രമാണ് ഈ പ്ലാറ്റ്‌ഫോമിൽ ലഭ്യമാകുക.
"ഉയർന്ന സുരക്ഷയും സ്വകാര്യതയും പ്രതീക്ഷിക്കുന്നതോടൊപ്പം കാഷ്‌‌ലെസ് ഭാവി സ്വീകരിക്കുന്ന, ഡിജിറ്റൽ സാങ്കേതികവിദ്യയിൽ ഏറെ മുന്നേറുന്ന ഒരു ജനവിഭാഗമാണ് ഇന്ത്യയിലുള്ളത്. അതുകൊണ്ടുതന്നെ ഇന്ത്യയിലെ ഉപയോക്താക്കൾക്കായി ആപ്പിൾ പേ എത്തിക്കുന്നതിൽ ഞങ്ങൾ വളരെ ആവേശഭരിതരാണ്," ആപ്പിൾ പേ, ആപ്പിൾ വാലറ്റ് എന്നിവയുടെ വൈസ് പ്രസിഡന്റ് ജെന്നിഫർ ബെയ്‌ലി പറഞ്ഞു.
റിസർവ് ബാങ്ക് ഓഫ് ഇന്ത്യയുടെ (ആർ.ബി.ഐ) ഓഗസ്റ്റിലെ കണക്കുകൾ പ്രകാരം, രാജ്യത്തെ നാലാമത്തെ വലിയ ക്രെഡിറ്റ് കാർഡ് വിതരണക്കാരായ ആക്സിസ് ബാങ്കിന് 16.29 ദശലക്ഷം ക്രെഡിറ്റ് കാർഡുകളാണുള്ളത്. എച്ച്.ഡി.എഫ്.സി ബാങ്കിന് 27.10 ദശലക്ഷവും ഐ.സി.ഐ.സി.ഐ ബാങ്കിന് 19.83 ദശലക്ഷവും കാർഡുകളുണ്ട്.
വിപണിയിലെ സാധ്യത വളരെ വലുതാണ്. ഓഗസ്റ്റിലെ ആർ.ബി.ഐ ഡാറ്റ പ്രകാരം ഇന്ത്യയിൽ ആകെ 124.05 ദശലക്ഷം ക്രെഡിറ്റ് കാർഡുകളാണുള്ളത്. സെപ്റ്റംബ‌ർ മാസത്തെ ക്രെഡിറ്റ് കാർഡ് ചെലവഴിക്കൽ ഏകദേശം 2.02 ലക്ഷം കോടി രൂപയോളമായിരുന്നു.
