സ്വകാര്യ ബസുകളുടെ മരണപ്പാച്ചിൽ; അപകടം പറ്റിയ ശേഷം FIR ഇട്ടിട്ട് എന്ത് കാര്യം? രൂക്ഷ വിമർശനവുമായി ഹൈക്കോടതി
സ്വകാര്യ ബസുകളുടെ മരണപ്പാച്ചിലിൽ അതിരൂക്ഷ വിമർശനവുമായി ഹൈക്കോടതി. നടുക്കുന്ന ദൃശ്യങ്ങളാണ് കഴിഞ്ഞ ദിവസം കൊച്ചിയിൽ കണ്ടത് എന്ന് കോടതി പറഞ്ഞു. കൊച്ചിയിൽ മത്സരയോട്ടം നടത്തുന്നതിനിടെ ബസിൽ നിന്ന് പുറത്തേക്ക് വീഴാൻ പോയതും ബസിന്റെ വാതിലിൽ തൂങ്ങി നിൽക്കുന്ന യാത്രക്കാരനെ മറ്റൊരു ബസ് അതിവേഗത്തിൽ മറികടക്കുന്നതിന്റെ ദൃശ്യങ്ങളും പുറത്തു വന്നത് കോടതി പരമാർശിച്ചു.
ഈ ദൃശ്യങ്ങളും കണ്ണൂരിൽ ഉണ്ടായ മറ്റൊരു അപകടത്തിന്റെ ദൃശ്യങ്ങളും ജസ്റ്റിസ് ദേവൻ രാമചന്ദ്രന്റെ ബെഞ്ച് കോടതി മുറിയിൽ നേരിട്ട് പ്രദർശിപ്പിച്ചു. അതിന് ശേഷമാണ് കോടതി രൂക്ഷമായ വിമർശനം ഉന്നയിച്ചത്. "ആ ഡ്രൈവർ ഇനി വാഹനമോടിക്കാതിരിക്കാൻ എന്തെങ്കിലും ചെയ്യാൻ പറ്റുമോ?" എന്ന് കോടതി ചോദിച്ചു.
"അപകടം പറ്റിയ ശേഷം FIR ഇട്ടിട്ട് എന്ത് കാര്യം?" എന്നും കോടതി ചോദിച്ചു. ട്രാഫിക് പോലീസ് പൂർണ പരാജയമാണ്. കമ്മീഷണറും പോലീസുകാരും ഉറങ്ങുകയാണോ?" എന്നും കോടതി അതിരൂക്ഷ വിമർശനം ഉന്നയിച്ചു.
