ബിരിയാണിയിൽ ചിക്കൻ കുറഞ്ഞു; പൊലീസ് സ്റ്റേഷനിലെ വിരമിക്കൽ പാർട്ടിയിൽ തല്ല്
കൊച്ചി: പൊലീസ് സ്റ്റേഷനിലെ വിരമിക്കൽ പാർട്ടിയിൽ തമ്മിൽത്തല്ല്. ബിരിയാണിയിൽ ചിക്കൻ കുറഞ്ഞു പോയതിനെ ചൊല്ലി ഹോം ഗാർഡുകൾ തമ്മിൽ പൊലീസ് സ്റ്റേഷന്റെ മുന്നിൽ ഏറ്റുമുട്ടി. പള്ളുരുത്തി ട്രാഫിക് സ്റ്റേഷനു മുന്നിലായിരുന്നു സംഭവം. ഹോം ഗാർഡുകളിൽ ഒരാൾക്ക് നൽകിയ യാത്രയയപ്പാണ് സംഘർഷത്തിൽ കലാശിച്ചത്.
യാത്രയയപ്പിനായി ഉച്ചക്ക് ഓർഡർ ചെയ്ത ബിരിയാണിയിലെ ചിക്കൻ കഷണങ്ങൾ ഒരാൾ അധികമായി എടുത്തതാണ് തർക്കത്തിന് കാരണം. ഈ വിഷയം പറഞ്ഞു തർക്കിച്ചു മദ്യപിച്ചിരുന്ന ഹോം ഗാർഡുകൾ തമ്മിൽ സ്റ്റേഷന് പുറത്ത് തമ്മിൽ തല്ലുകയായിരുന്നു. ജോർജ്, രാധാകൃഷ്ണൻ എന്നീ ഹോം ഗാർഡുകൾ തമ്മിലാണ് തല്ലുണ്ടായത്. സംഘർഷത്തിൽ പരിക്കേറ്റ രാധാകൃഷ്ണനെ ജനറൽ ആശുപത്രിയിൽ പ്രവേശിപ്പിച്ചു.
