'പ്രതിമുഖി' നാടകം ജോൺ ടി വേക്കൻ സംവിധാനം ചെയ്യും

തിരുവനന്തപുരം സത്വ ക്രിയേഷൻസ് കൾച്ചറൽ പ്ളാറ്റ്ഫോമിന്റെ സ്ത്രീ ഏകപാത്ര നാടകരചനാ പുരസ്ക്കാരത്തിന് അർഹമായ"പ്രതിമുഖി" അരങ്ങിലേയ്ക്ക്. പ്രമുഖ നാടകകൃത്തും സംവിധായകനും നടനും അഭിനയ പരിശീലകനുമായ ജോൺ ടി വേക്കനാണ് നാടകം സംവിധാനം ചെയ്യുന്നത്. 

 

1960-80 കാലഘട്ടത്തിൽ തിരുവനന്തപുരത്ത് ജി ശങ്കരപ്പിള്ള, ഭരത് ഗോപി, കരമന ജനാർദ്ദനൻനായർ തുടങ്ങിയവരോടൊപ്പം നാടകപ്രവർത്തകൻ, ചിത്രകാരൻ, ശില്പി, അദ്ധ്യാപകൻ തുടങ്ങിയ നിലകളിൽ പ്രവർത്തിച്ചിരുന്ന ബഹുമുഖ പ്രതിഭയായിരുന്നു എസ് സുകുമാരൻനായർ.അദ്ദേഹത്തിന്റെ പേരിൽ തിരുവനന്തപുരത്ത് രൂപീകരിച്ചിട്ടുള്ള എസ് സുകുമാരൻനായർ സ്മാരക സത്വ ക്രിയേഷൻസ് കൾച്ചറൽ പ്ളാറ്റ്ഫോമിന്റെ സ്ത്രീ ഏകപാത്ര നാടകരചനാ പുരസ്ക്കാരത്തിന് അർഹമായത് പുതുതലമുറയിലെ ശ്രദ്ധേയനായ കവിയും കഥാകൃത്തും നോവലിസ്റ്റും നാടകകൃത്തും ബാലസാഹിത്യകാരനും പ്രഭാഷകനുമായ വിമീഷ് മണിയൂർ രചിച്ച "പ്രതിമുഖി" എന്ന നാടകമാണ്.

അവാർഡ് പരിഗണനയ്ക്കായി ലഭിച്ച മുപ്പത്തെട്ട് നാടകങ്ങളിൽനിന്നാണ് "പ്രതിമുഖി" അവാർഡിനർഹമായത്.  നാടകത്തിൻ്റെ രചയിതാവ് വിമീഷ് മണിയൂർ നർത്തകി, ആകാശവാണി പ്രക്ഷേപക, അദ്ധ്യാപിക തുടങ്ങിയ നിലകളിൽ അനുഭവസമ്പന്നയായ അഭിനേത്രി ശാന്തി എം എസ് എന്നിവരുടെ ചർച്ചകൾ പൂർത്തിയായി.

കുടുംബങ്ങളിലും സമൂഹത്തിലും സ്ത്രീകൾ നേരിടുന്ന വളരെ ഗൗരവമുള്ള ഒരു വിഷയമാണ് "പ്രതിമുഖി" നാടകത്തിൻ്റേത്. സത്വ ക്രിയേഷൻസിൻ്റെ ഈ നാടകത്തിൻ്റെ നിർമ്മാണ നിർവ്വഹണത്തിലൂടെ ദിവ്യശ്രീ എന്ന യുവതി നാടകനിർമ്മാതാവാകുന്നു എന്ന പ്രത്യേകതയുമുണ്ട്. 

                           ദിവ്യശ്രീ

 2010ൽ വൈക്കം തിരുനാൾ നാടകവേദിക്കു വേണ്ടി ജോൺ ടി വേക്കൻ സംവിധാനം ചെയ്ത "നിങ്ങളെന്തിനാണ് എന്റെ കുട്ടിയെ പെരുമഴയത്ത് നിർത്തിയിരിക്കുന്നത്...?" എന്ന ഏകപാത്ര നാടകം പ്രമേയം, രചന, ആവിഷ്ക്കാരം, അവതരണം തുടങ്ങിയവയെ സംബന്ധിച്ച് ആസ്വാദകരും വിമർശകരും ചർച്ച ചെയ്യുകയും മാധ്യമങ്ങൾ മികച്ച അഭിപ്രായം രേഖപ്പെടുത്തുകയും ചെയ്തിരുന്നു.

സ്ത്രീകളുടെ അഭിമാനബോധത്തെയും അവകാശബോധത്തെയും

ആത്മബോധത്തെയും സ്വത്വബോധത്തെയും കുറിച്ചുള്ള ഈ നാടകവും ചർച്ച ചെയ്യപ്പെടേണ്ടതാണെന്ന് കരുതുന്നു. ആഗസ്റ്റ് 28ന് തിരുവനന്തപുരത്ത് "പ്രതിമുഖി"യുടെ പരിശീലനക്കളരി ആരംഭിക്കും.