വിവാഹം ഒന്നിന്റെയും അവസാനമല്ല; പെൺകുട്ടികളോട് മഞ്ജു വാര്യർ
നിലപാടുകളിലെ ദൃഢത കൊണ്ടും ബോൾഡ് ആയ വ്യക്തിത്വം കൊണ്ടും മഞ്ജു വാര്യർ വീണ്ടും ശ്രദ്ധേയയാകുന്നു. വനിതാ കമ്മീഷന്റെ ‘പറന്നുയരാം കരുത്തോടെ’ എന്ന ക്യാമ്പെയിനിന്റെ അംബാസഡർ എന്ന നിലയിൽ താരം നടത്തിയ പ്രസംഗമാണ് ഇപ്പോൾ സമൂഹമാധ്യമങ്ങളിൽ ചർച്ചയാകുന്നത്.
വിവാഹം എന്നത് ഒരു സ്ത്രീയുടെ ജീവിതത്തിലെ അന്തിമ ലക്ഷ്യമല്ലെന്നും, സ്വന്തം സ്വപ്നങ്ങളും ആഗ്രഹങ്ങളും സാക്ഷാത്കരിക്കാൻ ഓരോ സ്ത്രീക്കും സാമ്പത്തിക സ്വതന്ത്ര്യം അനിവാര്യമാണെന്നും മഞ്ജു വാര്യർ ഓർമ്മിപ്പിച്ചു.
വിവാഹം കഴിക്കണമോ വേണ്ടയോ എന്നത് ഓരോ സ്ത്രീയുടെയും വ്യക്തിപരമായ തീരുമാനമായിരിക്കണമെന്നും അതിൽ മറ്റാർക്കും അവകാശമില്ലെന്നും താരം വ്യക്തമാക്കി. വിവാഹം ഒന്നിന്റെയും അവസാനമല്ലെന്ന് തുറന്നുപറയാൻ ഇന്നത്തെ പെൺകുട്ടികൾക്ക് ധൈര്യമുണ്ട്. അത്തരം തീരുമാനങ്ങളെ മാനിക്കാനും അവർക്ക് പിന്തുണ നൽകാനും മാതാപിതാക്കൾ മുന്നോട്ട് വരുന്നത് സമൂഹത്തിൽ സംഭവിക്കുന്ന വലിയൊരു പോസിറ്റീവ് മാറ്റത്തിന്റെ അടയാളമാണെന്നും മഞ്ജു കൂട്ടിച്ചേർത്തു.
സ്വന്തം കാലിൽ നിൽക്കാൻ പ്രാപ്തിയുള്ളവരായി സ്ത്രീകൾ മാറണമെന്ന മഞ്ജുവിന്റെ വാക്കുകൾക്ക് വലിയ കൈയടിയാണ് ലഭിക്കുന്നത്. തന്റെ ജീവിതത്തിലൂടെ തന്നെ ഇത്തരം ബോൾഡ് തീരുമാനങ്ങൾ പ്രായോഗികമാക്കി കാണിച്ച മഞ്ജുവിന്റെ ഈ പ്രതികരണം സ്ത്രീ ശാക്തീകരണത്തിന് വലിയ ഊർജ്ജം നൽകുന്നതാണ്. നിശബ്ദമായ പോരാട്ടങ്ങളിലൂടെ സന്തോഷം കണ്ടെത്താൻ ശ്രമിക്കാറുണ്ടെന്ന നടി ഭാവനയുടെ വാക്കുകളെ കൂടി ചേർത്തുവായിക്കുമ്പോൾ, മലയാള സിനിമയിലെ മുൻനിര നടിമാർ സമൂഹത്തിന് നൽകുന്ന വ്യക്തമായ സന്ദേശം ഏറെ പ്രസക്തമാകുന്നു.
