ഏകദിന റാങ്കിങ്ങിൽ കോഹ്ലി വീണ്ടും ഒന്നാമൻ
നീണ്ട ഇടവേളയ്ക്ക് ശേഷം ഐസിസി ഏകദിന ബാറ്റർമാരുടെ റാങ്കിങ്ങിൽ ഒന്നാം സ്ഥാനം തിരിച്ചുപിടിച്ച് ഇന്ത്യൻ സൂപ്പർ താരം വിരാട് കോഹ്ലി. 785 പോയിന്റുമായാണ് കോഹ്ലി പട്ടികയിൽ ഒന്നാമതെത്തിയത്. 2021 ഏപ്രിൽ രണ്ടിന് ശേഷം ഇതാദ്യമായാണ് താരം ഈ നേട്ടം കൈവരിക്കുന്നത്.
ന്യൂസിലാൻഡിനെതിരെ നടന്നുകൊണ്ടിരിക്കുന്ന ഏകദിന പരമ്പരയിലെ തകർപ്പൻ പ്രകടനമാണ് കോഹ്ലിയെ വീണ്ടും ഒന്നാമനാക്കിയത്. ഒന്നാം ഏകദിനത്തിൽ 91 പന്തിൽ നിന്ന് 93 റൺസ് താരം നേടിയിരുന്നു. കൂടാതെ, അവസാനമായി കളിച്ച അഞ്ച് ഏകദിനങ്ങളിൽ നിന്ന് രണ്ട് സെഞ്ച്വറികളും മൂന്ന് അർധസെഞ്ച്വറികളും കോഹ്ലി അടിച്ചുകൂട്ടി.
അതുവരെ ഒന്നാം സ്ഥാനത്തുണ്ടായിരുന്ന ഇന്ത്യൻ നായകൻ രോഹിത് ശർമ്മയ്ക്ക് കിവികൾക്കെതിരായ ആദ്യ മത്സരത്തിൽ തിളങ്ങാൻ കഴിഞ്ഞില്ല. ഇതോടെ 775 പോയിന്റുമായി രോഹിത് മൂന്നാം സ്ഥാനത്തേക്ക് പിന്തള്ളപ്പെട്ടു. ന്യൂസിലാൻഡ് താരം ഡാരിൽ മിച്ചലാണ് (784 പോയിന്റ്) കോഹ്ലിക്ക് തൊട്ടുപിന്നിൽ രണ്ടാം സ്ഥാനത്തുള്ളത്.
