ആരുമായും ഡീല് ഇല്ല, എല്ഡിഎഫിന് വോട്ട് ചെയ്തത് അബദ്ധത്തില്; വടക്കാഞ്ചേരിയില് കോഴ വാങ്ങി വോട്ടുമറിച്ചെന്ന ആരോപണങ്ങൾ തള്ളി ഇ യു ജാഫര്
തൃശൂർ: വടക്കാഞ്ചേരി ബ്ലോക്ക് പഞ്ചായത്ത് പ്രസിഡന്റ് തിരഞ്ഞെടുപ്പില് 50 ലക്ഷം കോഴ വാങ്ങി വോട്ടുമറിച്ചെന്ന വിവാദത്തില് ആരോപണങ്ങള് തള്ളി ലീഗ് സ്വതന്ത്രന് ഇ യു ജാഫര്. എല്ഡിഎഫിന് വോട്ട് ചെയ്തത് അബദ്ധത്തിലാണെന്നും പണം വാങ്ങിയിട്ടില്ലെന്നും ജാഫര് പറഞ്ഞു.
പിന്തുണ ആവശ്യപ്പെട്ട് സിപിഎം നേതാക്കള് വിളിച്ചിട്ടില്ല. തെറ്റ് പറ്റിയതില് കുറ്റബോധം ഉണ്ട്. നുണപരിശോധനയ്ക്ക് വരെ തയാറാണെന്നും ആരുമായും ഡീല് ഇല്ലെന്നും ജാഫര് വ്യക്തമാക്കി.
ബ്ലോക്ക് പഞ്ചായത്ത് പ്രസിഡന്റ് തിരഞ്ഞെടുപ്പില് കൂറുമാറി എല്ഡിഎഫിന് വോട്ടുചെയ്യാന് സിപിഎം 50 ലക്ഷം രൂപ വാഗ്ദാനം ചെയ്തതായി ഇ യു ജാഫര് പറയുന്ന ശബ്ദരേഖ നേരത്തെ പുറത്തുവന്നിരുന്നു. വടക്കാഞ്ചേരി ബ്ലോക്കിലെ തളി ഡിവിഷനില്നിന്ന് വിജയിച്ച ഇ യു ജാഫര് കോണ്ഗ്രസ് നേതാവിനോട് നടത്തിയ വെളിപ്പെടുത്തലാണ് പുറത്തായത്. പ്രസിഡന്റ് തിരഞ്ഞെടുപ്പിന് തലേന്നായിരുന്നു സംസാരം നടന്നത്.
എല്ഡിഎഫിനും യുഡിഎഫിനും ഏഴ് വീതം അംഗങ്ങള് ഉണ്ടായിരുന്ന ബ്ലോക്ക് പഞ്ചായത്തില് ജാഫര് കൂറുമാറി വോട്ട് ചെയ്തതോടെ എല്ഡിഎഫ് വിജയിച്ചിരുന്നു. വൈസ് പ്രസിഡന്റ് തിരഞ്ഞെടുപ്പില് വോട്ട് ചെയ്യാൻ എത്താതിരുന്നതോടെ ആ സ്ഥാനവും എൽഡിഎഫിന് ലഭിച്ചു. തൊട്ടടുത്ത ദിവസം ജാഫര് ബ്ലോക്ക് പഞ്ചായത്ത് അംഗത്വം രാജിവച്ചിരുന്നു.
