ചേരാനല്ലൂര്‍ ബെൻസ് അപകടം: വീഴ്ച വരുത്തിയ 4 പൊലീസുകാര്‍ക്ക് സസ്പെൻഷൻ
കൊച്ചി: എറണാകുളം ചേരാനല്ലൂരില്‍ ബെൻസ് കാറിടിച്ച് സ്‌കൂട്ടര്‍ യാത്രികന്‍ മരിച്ച സംഭവത്തില്‍, വിഷയം കൈകാര്യം ചെയ്തതിൽ വീഴ്ച വരുത്തിയ പൊലീസ് ഉദ്യോഗസ്ഥർക്ക് സസ്പെൻഷൻ. സിഐ ഉൾപ്പെടെ നാലു ഉദ്യോഗസ്ഥരെയാണ് സസ്പെൻഡ് ചെയ്തത്. സിഐ ശ്യാംകുമാര്‍, എസ്എച്ച്ഒ വിശ്വജിത്ത്, സിപിഒ അരുണ്‍, എഎസ്‌ഐ മനോജ് എന്നിവര്‍ക്കെതിരെയാണ് നടപടി സ്വീകരിച്ചതെന്നാണ് റിപ്പോർട്ട്.
തൃശ്ശൂർ അഡീഷണൽ ഡിസ്ട്രിക്റ്റ് ജഡ്ജിയുടെ മകനായ 17 കാരന് കേസിൽ സ്റ്റേഷൻ ജാമ്യം ലഭിച്ചതിൽ അടക്കം വിമർശനം ഉയർന്നിരുന്നു.
അതേസമയം, സംവത്തിൽ പ്രായപൂർത്തിയാവാത്ത മകന് വാഹനമോടിക്കാൻ കൊടുത്തതിൽ ജഡ്ജിയുടെ പേരിലും കേസെടുത്തിട്ടുണ്ട്. കൊല്ലപ്പെട്ട ജയബാലകൃഷ്ണന്റെ കുടുംബത്തിന്റെ കടുത്ത പ്രതിഷേധത്തിനൊടുവിലാണ് പൊലീസ് പ്രതിയുടെ പിതാവിനെതിരെ കേസെടുത്തത്.
കൊച്ചി സിറ്റി പൊലീസ് അതിർത്തിയിലെ ചേരാനല്ലൂരിൽ വെച്ച്, ഞായറാഴ്ച പുലർച്ചെയായിരുന്നു അപകടം. തട്ടുകട അടച്ച് വീട്ടിലേക്ക് മടങ്ങുന്നതിനിടെയാണ് ജയബാലകൃഷ്ണൻ അപകടത്തിൽപ്പെട്ടത്. അമിതവേഗത്തിലെത്തിയ കാർ ജയപാലകൃഷ്ണൻ ഓടിച്ച സ്‌കൂട്ടറിന് പിന്നിൽ ഇടിക്കുകയായിരുന്നു എന്നാണ് റിപ്പോർട്ട്. ഇടിയുടെ ആഘാതത്തിൽ സ്‌കൂട്ടർ പൂർണമായും തകരുകയും ജയപാലകൃഷ്ണൻ റോഡിലേക്ക് തെറിച്ചു വീഴുകയും ചെയ്തു.
