സി.എം.ആർ.എൽ–എക്സാലോജിക് കേസ് ബുധനാഴ്ച പരിഗണിക്കും; പിണറായി വിജയന്റെ ഹർജിയിൽ സുപ്രീം കോടതിയിൽ പ്രത്യേക ബെഞ്ച്

സി.എം.ആർ.എൽ–എക്സാലോജിക് ഇടപാടുമായി ബന്ധപ്പെട്ട വിജിലൻസ് കേസിൽ നടപടികൾ സ്റ്റേ ചെയ്യണമെന്നാവശ്യപ്പെട്ട് പിണറായി വിജയൻ നൽകിയ ഹർജിയിൽ വാദം കേൾക്കാൻ സുപ്രീം കോടതി പ്രത്യേക ബെഞ്ച് രൂപീകരിച്ചു. ജസ്റ്റിസ് ജോയ് മാല ബാഗ്ചിയും ജസ്റ്റിസ് വി. മോഹ്നയും ഉൾപ്പെട്ട ബെഞ്ച് ബുധനാഴ്ച ഹർജി പരിഗണിക്കും. കേസിലെ തുടർനടപടികൾക്ക് ഇടക്കാല സംരക്ഷണം ലഭിക്കുമോ എന്നതടക്കമുള്ള കാര്യങ്ങളിൽ കോടതി വാദം കേൾക്കും.

വിജിലൻസ് കേസിനെതിരെ പിണറായി വിജയൻ, വീണ ടി., മുഹമ്മദ് റിയാസ്, ഹസൻ വാരിസ് എന്നിവർ സുപ്രീം കോടതിയിൽ ഹർജികൾ നൽകിയിട്ടുണ്ട്. ഈ ഹർജികളെല്ലാം ബുധനാഴ്ച പരിഗണിക്കാനാണ് തീരുമാനം. സി.എം.ആർ.എൽ–എക്സാലോജിക് ഇടപാടുമായി ബന്ധപ്പെട്ട കേസിൽ നിയമനടപടികൾ തുടരുന്നതിനിടെയാണ് സുപ്രീം കോടതിയിലെ ഈ നീക്കം.

കേസ് പരിഗണിച്ചപ്പോൾ പിണറായി വിജയന് അറസ്റ്റ് നേരിടേണ്ടിവരാൻ സാധ്യതയുണ്ടെന്ന് അദ്ദേഹത്തിനുവേണ്ടി ഹാജരായ മുതിർന്ന അഭിഭാഷകൻ സിദ്ധാർത്ഥ് ലൂതറ ചൂണ്ടിക്കാട്ടിയിരുന്നു. പിണറായി വിജയന് 82 വയസ്സായതിനാൽ അന്നുതന്നെ കേസ് പരിഗണിച്ച് ഇടക്കാല സംരക്ഷണം നൽകണമെന്നും അദ്ദേഹം ആവശ്യപ്പെട്ടു. എന്നാൽ സുപ്രീം കോടതിയിലെ ബെഞ്ചുകളിൽ കേസുകളുടെ തിരക്ക് കൂടുതലാണെന്ന് ചീഫ് ജസ്റ്റിസ് ചൂണ്ടിക്കാട്ടി.

അടുത്ത ആഴ്ച പ്രത്യേക ബെഞ്ച് രൂപീകരിച്ച് ഹർജികളിൽ വാദം കേൾക്കുന്ന കാര്യം പരിഗണിക്കാമെന്നായിരുന്നു ചീഫ് ജസ്റ്റിസിന്റെ അന്നത്തെ നിലപാട്. ഇതിന് പിന്നാലെയാണ് പ്രത്യേക ബെഞ്ച് രൂപീകരിച്ച് ബുധനാഴ്ച വാദം കേൾക്കാൻ തീരുമാനിച്ചത്