ഇന്ത്യ പ്രസ് ക്ലബ് ഓഫ് നോര്‍ത്ത് അമേരിക്കയ്ക്ക് പുതിയ ഭാരവാഹികള്‍
ന്യൂയോര്‍ക്ക്: ഇന്ത്യ പ്രസ് ക്ലബ് ഓഫ് നോര്‍ത്ത് അമേരിക്കയുടെ (ഐപിസിഎൻഎ) അടുത്ത രണ്ട് വര്‍ഷത്തെ പ്രസിഡന്‍റായി സാമുവല്‍ ഈശോയും (സുനില്‍ ട്രൈസ്റ്റാര്‍), ജനറല്‍ സെക്രട്ടറിയായി ഷിജോ പൗലോസും ട്രഷററായി വിശാഖ് ചെറിയാനും വൈസ് പ്രസിഡന്‍റായി അനില്‍കുമാര്‍ ആറന്മുളയും ജോയിന്‍റ് സെക്രട്ടറിയായി ആശാ മാത്യുവും ജോയിന്‍റ് ട്രഷററായി റോയി മുളകുന്നവും ജനുവരി ഒന്ന് മുതല്‍ സ്ഥാനമേല്‍ക്കും.
മാധ്യമ പ്രവര്‍ത്തനത്തിനൊപ്പം സമൂഹ നന്മയുമെന്ന ലക്ഷ്യം സംഘടന തുടരും. കേരളത്തിലെ മുഖ്യധാര മാധ്യമപ്രവര്‍ത്തനവുമായുള്ള നല്ല ബന്ധവും തുടരും. ഇതിനു പുറമെ കേരള മീഡിയ അക്കാഡമിയുമായി സഹകരിച്ചു ജേര്‍ണലിസം വിദ്യാര്‍ഥികള്‍ക്കുള്ള പിന്തുണ നല്‍കുന്നതിനും കേരളത്തിലെ പ്രസ്ക്ലബുകളുമായി സഹകരിക്കാനും നാട്ടിലെ വിഷമതയനുഭവിക്കുന്ന മാധ്യമപ്രവര്‍ത്തകര്‍ക്ക് സഹായമെത്തിക്കുന്നതു തുടരുമെന്നും ഭാരവാഹികള്‍ അറിയിച്ചു.
ഐപിസിഎൻഎയുടെ ഏറ്റവും നല്ല ഒരു രാജ്യാന്തര കോണ്‍ഫറൻസ് മയാമിയില്‍ ഒരുക്കിയ പ്രസിഡന്‍റ് സുനില്‍ തൈമറ്റം പകര്‍ന്നു നല്‍കിയ ദീപനാളം ഏറ്റുവാങ്ങി നിലവിളക്ക് തെളിയിച്ച്‌ നിയുക്ത പ്രസിഡന്‍റ് സുനില്‍ ട്രൈസ്റ്റാര്‍ പ്രതീകാത്മകമായി സ്ഥാനമേറ്റിരുന്നു.
