മിനിമം ബാലൻസ് 50,000 രൂപയാക്കി ഉയർത്തി ഐസിഐസിഐ ബാങ്ക്

ന്യൂഡൽഹി: സേവിം​ഗസ് അക്കൗണ്ടുകളിലെ മിനിമം ബാലൻസ് തുക 50,000 രൂപയായി ഉയർത്തി ഇന്ത്യയിലെ രണ്ടാമത്തെ വലിയ ബാങ്കായ ഐസിഐസിഐ ബാങ്ക്. ഓഗസ്റ്റ് ഒന്നിന് ശേഷം പുതിയ അക്കൗണ്ട് തുറന്ന ഉപഭോക്താക്കൾക്ക് മാത്രമാണ് ഇത് ബാധകം. നിലവിലെ ഉപഭോക്താക്കൾക്ക് പഴയ നിരക്ക് തുടരും. നേരത്തെ ഇത് 10,000 രൂപയായിരുന്നു. പുതിയ ഉപഭോക്താക്കൾ പിഴ ഒഴിവാക്കാൻ പ്രതിമാസം ശരാശരി 50,000 രൂപ ബാലൻസ് നിലനിർത്തണം.

അതേസമയം, പഴയ ഉപഭോക്താക്കളുടെ ഏറ്റവും കുറഞ്ഞ ശരാശരി ബാലൻസ് 10,000 രൂപയായി തുടരും. കൂടാതെ, അർദ്ധ നഗര പ്രദേശങ്ങളിലെ പുതിയ ഉപഭോക്താക്കൾ 25,000 രൂപയും ഗ്രാമീണ മേഖലയിലെ ഉപഭോക്താക്കൾ 10,000 രൂപയും കുറഞ്ഞത് ബാലൻസ് നിലനിർത്തേണ്ടതുണ്ട്. എന്നാൽ ഗ്രാമപ്രദേശങ്ങളിലും അർദ്ധ നഗരപ്രദേശങ്ങളിലും പഴയ ഉപഭോക്താക്കൾക്ക് പ്രതിമാസം മിനിമം ശരാശരി ബാലൻസ് 5,000 രൂപയായി തുടരും. മിനിമം ശരാശരി ബാലൻസ് നിലനിർത്താത്ത ഉപഭോക്താക്കൾക്ക് 500 രൂപ പിഴ അല്ലെങ്കിൽ എത്ര രൂപയാണോ കുറവ് അതിന്റെ 6 ശതമാനം പിഴ ഇവയിൽ ഏതാണ് കുറവെന്നാൽ അത് ഈടാക്കും.

മറ്റ് മിക്ക ബാങ്കുകളും വളരെ കുറഞ്ഞ വായ്പാ പരിധിയാണ് നിലനിർത്തുന്നത്, സാധാരണയായി 2,000 രൂപയ്ക്കും 10,000 രൂപയ്ക്കും ഇടയിലാണ് പല ബാങ്കുകളും മിനിമം ബാലൻസായി ആവശ്യപ്പെടുന്നത്. തേഡ് പാർട്ടി കാഷ് ഡിപ്പോസിറ്റിനും മാറ്റം കൊണ്ടുവന്നിട്ടുണ്ട്. ഒറ്റത്തവണ 25,000 രൂപ വരെയാണ് സേവിങ്സ് അക്കൗണ്ടുകളിൽ തേഡ് പാർട്ടി ഡിപ്പോസിറ്റ് നടത്താനാവുക.