ശരീരത്തെയും ആത്മാവിനെയും തൊട്ടുണർത്തും... ആഫ്രിക്കൻ മണ്ണിലെ ജലശുദ്ധീകരണ ചികിത്സ
ലീലാമ്മ തോമസ്, ബോട്സ്വാന
ആഫ്രിക്കയിൽ ചില ഗോത്രങ്ങളിൽ ഇന്നും പിന്തുടരുന്ന പുരാതന ചികിത്സാരീതി ആണ് ഇത്. ഇവിടുത്തെ ട്രഡിഷണൽ ഡോക്ടർ സാംഗോമ..ഔഷധച്ചെടികളും മന്ത്രങ്ങളും മാത്രം ഉപയോഗിക്കുന്ന ഒരാൾ അല്ല. ശരീരത്തെയും ആത്മാവിനെയും ഒരുമിച്ച് ശുദ്ധീകരിക്കുന്ന ചികിത്സയാണ് അദ്ദേഹത്തിന്റെത്.
ഈ ചിത്രത്തിൽ കാണുന്നത് ഒരു ജലശുദ്ധീകരണ ചികിത്സ ആണ്.ചില പ്രത്യേക രോഗങ്ങൾക്കും, മനസ്സിന്റെ ഭാരത്തിനും, ദുഷ്ടശക്തികളുടെ ബാധയെന്നു വിശ്വസിക്കുന്ന അവസ്ഥകൾക്കും ഈ ചികിത്സ ചെയ്യാറുണ്ട്. ചെടികളിൽ നിന്നെടുത്ത കഷായം കലർത്തിയ വെള്ളത്തിലാണ് ഇങ്ങനെ ഇരിക്കുന്നത്. വെള്ളം ശരീരത്തിലെ നെഗറ്റീവ് എനർജി പുറത്തെടുക്കുന്നു എന്നാണ് ഇവിടുത്തെ വിശ്വാസം.
ചികിത്സ നടക്കുമ്പോൾ പരിസരം ശാന്തമായിരിക്കണം. അതിനാലാണ് ചടങ്ങിനിടെ ഗോത്രത്തിന്റെ.. (ദേശത്തിന്റെ ) പതാക പിടിച്ച് നിൽക്കുന്നത്. ആ ഭൂമിയുടെ ആത്മാവിനെയും, പാരമ്പര്യത്തെയും സാക്ഷിയാക്കാൻ. ഇത് ഒരു ഷോ അല്ല. ഇത് തലമുറകളിലൂടെ കൈമാറപ്പെട്ട അറിവാണ്. ആധുനിക ആശുപത്രികളേക്കാൾ മുൻപ് മനുഷ്യനെ രക്ഷിച്ചിരുന്ന അറിവ്.
ആഫ്രിക്കയിൽ ഇപ്പോഴും വിശ്വാസവും ചികിത്സയും വേർപിരിയാത്ത ഒരു ജീവിതമാണ്.
