മജീഷ്യൻ മുതുകാട് ഷോ 'എംക്യൂബ്' - 6 ഞായറാഴ്ച വൈകിട്ട് 5:30-ന് ക്വീൻസ്ബൊറോ കോളേജിൽ; ലോകപ്രശസ്‌ത മാന്ത്രികൻ ടോണി ഹസ്സിനി മുഖ്യാതിഥി

മാത്യുക്കുട്ടി ഈശോ

ന്യൂയോർക്ക്:  കഴിഞ്ഞ അഞ്ചു വർഷമായി സ്റ്റേജ് ഷോകൾ നിർത്തി വച്ചിരുന്ന ലോകപ്രശസ്ത മാന്ത്രികൻ പ്രൊഫ. ഗോപിനാഥ് മുതുകാട് തൻറെ പുതിയ പ്രോജക്ടിന്റെ ധനശേഖരണാർധം അവതരിപ്പിക്കുന്ന ഷോ "എംക്യൂബ്"  (M-CUBE - Majic-Mission-Melody) സെപ്റ്റംബർ 6 ഞായറാഴ്ച്ച ന്യൂയോർക്ക് ക്വീൻസ്ബൊറോ കമ്മ്യൂണിറ്റി കോളേജ് ഓഡിറ്റോറിയത്തിൽ  (Queensborough Community College, 222-05 56th Avenue, Bayside, New York 11364) വൈകിട്ട് 5:30-ന് അരങ്ങേറുന്നു. ഭിന്ന ശേഷിക്കാരായ (Differently Abled) ഇരുന്നൂറോളം കുട്ടികളുടെ ജീവിത പുനരുദ്ധാരണത്തിനായി തിരുവനന്തപുരം കഴക്കൂട്ടത്ത് ഡിഫറൻറ് ആർട്സ്‌ സെന്റർ (Different Arts Center - DAC) എന്ന സ്ഥാപനത്തിൻറെ നടത്തിപ്പിനായി സ്വന്തം ജീവിതം മാറ്റി വച്ചതിനാലാണ് കഴിഞ്ഞ അഞ്ചു വർഷത്തിലധികമായി സ്റ്റേജ് ഷോകൾ നിർത്തി വയ്ക്കുവാൻ പ്രൊഫ. മുതുകാടിനെ നിർബന്ധിതനാക്കിയത്.  

അതിനിടയിൽ കാസർഗോഡ് എൻഡോസൾഫാൻ ബാധിതരായ ആയിരക്കണക്കിന്  ഭിന്നശേഷിക്കാരുടെ ജീവിത സാഹചര്യങ്ങൾ അടുത്തറിയുവാൻ ഇടയായ മുതുകാടിന്‌ അവർക്കു വേണ്ടി എന്തെങ്കിലും ചെയ്യണമെന്ന ആഗ്രഹം മനസ്സിലുദിച്ചു.

ഈ ആഗ്രഹം മനസ്സിൽ കൊണ്ടുനടക്കുമ്പോഴാണ് ഏതാനും വർഷങ്ങൾക്ക്   മുമ്പ് അമേരിക്കൻ പര്യടനത്തിൽ വച്ച്  പരിചയപ്പെട്ട  പരേതനായ പ്രൊഫ. ഡോ. എം. കെ. ലുക്കാ സാർ കാസർഗോഡ് എൻഡോസൾഫാൻ ബാധിതരെ പുനരധിവസിപ്പിക്കുവാൻ എന്തെങ്കിലും ചെയ്യണം എന്ന ആവശ്യം അറിയിച്ചത്. കോട്ടയം ബി.സി.എം. കോളേജിൽ അദ്ധ്യാപകനായി ഏതാനും വർഷം സേവനം ചെയ്‌ത പാലാ സ്വദേശിയായ അസ്സിസ്റ്റൻറ്  പ്രൊഫസ്സർ  ഡോ. എം. കെ. ലൂക്കാ കുറേ വർഷങ്ങളായി അമേരിക്കയിലേക്ക് കുടിയേറി പാർക്കുകയായിരുന്നു. തൻറെ ജീവിത സമ്പാദ്യം മുഴുവനും നിരാലംബർക്കായി മാറ്റി വച്ച് ജീവകാരുണ്യ പ്രവർത്തനം ചെയ്തുവന്ന ലൂക്കാ സാർ മുതുകാടിനൊപ്പം കാസർഗോഡ് ഭാഗങ്ങളിൽ ചുറ്റിക്കറങ്ങി എൻഡോസൾഫാൻ ബാധിതരുടെ പുനരധിവാസത്തിനായി ഇരുപത് ഏക്കർ സ്ഥലം വാങ്ങി. പ്രസ്തുത സ്ഥലം വാങ്ങുന്നതിന് ആവശ്യമായ മുഴുവൻ തുകയും ലൂക്കാ സാർ നൽകുകയും ആ ഇരുപത് ഏക്കർ സ്ഥലം ഒരു ചാരിറ്റബിൾ സൊസൈറ്റിയുടെ പേരിൽ രജിസ്റ്റർ ചെയ്യുകയും ചെയ്‌തു.  പക്ഷേ, വിധിയുടെ ക്രൂരത എന്നോണം,  അതിനു ശേഷം ഏതാനും മാസങ്ങൾക്കകം കാൻസർ ബാധിതനായിരുന്ന ലൂക്കാ സാർ നിർഭാഗ്യവശാൽ ഈ ലോകത്തോട് വിട പറഞ്ഞു.

മരിക്കുന്നതിന് മുമ്പ് ആ പ്രോജെക്ട് എങ്ങനെയെങ്കിലും നടപ്പിലാക്കണം എന്ന ലൂക്കാ സാറിൻറെ ആഗ്രഹ സഫലീകരണത്തിനാണ് നിർത്തി വച്ച സ്റ്റേജ് ഷോ വീണ്ടും അവതരിപ്പിച്ച്  എൻഡോസൾഫാൻ ബാധിതരുടെ പുനരധിവാസത്തിനുള്ള പുതിയ പ്രോജെക്ടിന് ധനസമാഹരണത്തിനായി "എംക്യൂബ്" എന്ന ഫ്യൂഷൻ പരിപാടി നടത്തുന്നത്.

മാജിക്കും (Majic) സംഗീതശ്രുതിമാധുര്യത്തിൻറെ മെലഡിയും (Melody) ഒരു പ്രത്യേക ദൗത്യത്തിനായി (Mission) സമന്വയിപ്പിച്ച് അവതരിപ്പിക്കുന്ന ഈ പ്രോഗ്രാമിന്  മൂന്ന് എം (M) എന്ന അക്ഷരങ്ങൾ (Majic-Melody-Mission = M3) ചേർത്ത് “എംക്യൂബ്”  എന്ന പേര് നൽകി  അവതരിപ്പിക്കുന്നത്.

കഴിഞ്ഞ രണ്ടുമൂന്ന് ആഴ്ച്ചകളായി അമേരിക്കയിലെ വിവിധ സംസ്ഥാനങ്ങളിൽ അവതരിപ്പിച്ച ഈ മനോഹരമായ പരിപാടിക്ക്  വളരെയധികം  ജനപിന്തുണയാണ് ലഭിക്കുന്നത്. ഭിന്നശേഷിക്കാരുടെയും എൻഡോസൾഫാൻ ബാധിതരുടെയും ജീവിത സാഹചര്യങ്ങൾ വീഡിയോ-വാളിലൂടെ പ്രദർശിപ്പിച്ച് മാജിക്ക് അവതരണത്തിലൂടെ നമ്മെ മായാലോകത്തിലേക്ക് കൊണ്ടുപോയി ശ്രുതിമധുരമായ സംഗീതത്തിലൂടെ സമന്വയിപ്പിച്ച് രണ്ടര മണിക്കൂറോളം നമ്മുടെ ഹൃദയങ്ങളെ പിടിച്ചുലച്ച് ഈറനണിയിക്കുന്ന അനുഭവത്തിലേക്കാണ് ഈ പരിപാടി അവസാനിപ്പിക്കുന്നത്.  പരിപാടി കഴിയുമ്പോൾ ഏതൊരു കഠിന ഹൃദയനും എൻഡോസൾഫാൻ ബാധിതരായവരുടെ ഉന്നമനത്തിനായുള്ള ഈ പ്രോജക്ടിലേക്ക്  തങ്ങളാലാകും വിധം സഹായം നൽകണമെന്ന്  ഹൃദയ കാഠിന്യം മാറ്റി ചിന്തിക്കുന്ന  അവസ്ഥയാണ് ഉണ്ടാകുന്നത്. ഈ വർഷത്തെ ഈ പരിപാടികളിലെ ഏറ്റവും അവസാനത്തെ ഷോയാണ്  ക്വീൻസ്ബൊറോ കോളേജിൽ നടത്തുന്നത്.  ന്യൂയോർക്കിലും Different Arts Center (DAC) ഒരു 501(C)(3) ചാരിറ്റി ഓർഗനൈസേഷൻ ആയി രജിസ്റ്റർ ചെയ്തിട്ടുള്ളതിനാൽ സംഭാവന നൽകുന്നവർക്ക് ഇൻകം ടാക്സ് (Income Tax)  ഇളവിന് അർഹരാണ്.

ഭിന്ന ശേഷിക്കാർക്കായി ചെയ്യുന്ന പ്രൊഫ. മുതുകാടിൻറെ പ്രൊജെക്ടുകളെപ്പറ്റി മനസ്സിലാക്കിയ  ലോക പ്രശസ്‌തനായ മാന്ത്രികൻ  ടോണി ഹസ്സിനി ഈ പ്രോജക്ടിന് പിന്തുണ അറിയിക്കുന്നതിനായി ലോസ്സാൻജലസിൽ നിന്നും പരിപാടിയിൽ പങ്കെടുക്കുന്നതിന് ന്യൂയോർക്കിൽ എത്തിച്ചേരുമെന്ന് അറിയിച്ചിട്ടുണ്ട്.  

ഇന്റർനാഷണൽ മജിഷ്യൻസ് സൊസൈറ്റി (International Magicians Society - IMS) സ്ഥാപകനാണ്  ടോണി ഹസ്സിനി. ലോകത്തിലെ ഏറ്റവും നല്ല മാന്ത്രികർക്കുള്ള "മെർലിൻ അവാർഡ്" ഹസ്സിനിയുടെ ഉടമസ്ഥതയിലുള്ള ഇന്റർനാഷണൽ മജിഷ്യൻസ് സൊസൈറ്റിയാണ് നൽകി വരുന്നത്. 2011-ലെ പ്രസ്തുത മെർലിൻ അവാർഡ് ജേതാവ് കൂടിയാണ് പ്രൊഫ. ഗോപിനാഥ്  മുതുകാട്. 

ഷോ കാണേണമെന്ന് ആഗ്രഹിക്കുന്നവർക്ക് ഓഡിറ്റോറിയത്തിന്റെ കവാടത്തിൽ   ടിക്കറ്റുകൾ ലഭിക്കുന്നതിനുള്ള  ക്രമീകരണങ്ങൾ ചെയ്യുന്നതാണ്.  സെപ്തംബർ  6-ലെ ഷോ സംബന്ധിച്ച വിവരങ്ങൾക്കും ടിക്കറ്റുകൾക്കുമായി ബന്ധപ്പെടുക:   (1)  Paul Karukappillil  -  (845) 553-5671    (2)  Johnson Samuel  - (646) 996-1692   (3)   Biju Chacko   (516) 996-4611   (4)  George Parambil -  (646) 739-0060  (5)  Ajith Kochuz  -  (516) 225-2814   (6)  Mathewkutty Easow  - (516) 455-8596.