കഴിഞ്ഞ വര്‍ഷം യു എസ് പൗരത്വം നേടിയത് 59,000ലധികം ഇന്ത്യക്കാർ
59,000ലധികം ഇന്ത്യക്കാർ 2023 ല്‍ അമേരിക്കൻ പൗരത്വം നേടിയെന്ന് റിപ്പോർട്ട്. അമേരിക്കൻ സിറ്റിസണ്‍ഷിപ്പ് ആൻഡ് ഇമിഗ്രേഷൻ സർവീസ് (USCIS) പുറത്തിവിട്ട കണക്കുകള്‍ അനുസരിച്ചാണ് ഈ റിപ്പോർട്ട്.
മെക്സിക്കോ സ്വദേശികളാണ് കുടിയേറ്റക്കാരില്‍ ഒന്നാം സ്ഥാനത്ത്.
1.1 ലക്ഷം മെക്സിക്കൻ സ്വദേശികളാണ് യുഎസ് പൗരത്വം നേടിയത്. യുഎസ് പൗരത്വം നേടിയ ആകെ ആളുകളില്‍ 12.7 ശതമാനത്തോളം വരുമിത്. ആകെ പൗരത്വം നേടിയവരില്‍ 44,800 പേർ ഫിലിപ്പീൻസ് സ്വദേശികളും 35,200 പേർ ഡൊമിനിക്കൻ റിപ്പബ്ലിക്കില്‍ നിന്നുള്ളവരുമാണ്.
കഴിഞ്ഞ ഒരു ദശാബ്ദ കാലത്തിനുള്ളില്‍ മാത്രം 7.7 മില്യണ്‍ വിദേശ പൗരന്മാരാണ് യുഎസ് പൗരത്വം നേടിയത്. ഇമിഗ്രേഷൻ ആൻഡ് നാഷണാലിറ്റി ആക്‌ട് (INA) പ്രകാരം യുഎസ് പൗരത്വം നേടാൻ യു എസ് സി ഐ എസ് (USCIS) നിർദ്ദേശിക്കുന്ന ചില നിബന്ധനകള്‍ പാലിച്ചിരിക്കണം. കുറഞ്ഞത് അഞ്ച് വർഷമായെങ്കിലും അമേരിക്കയില്‍ സ്ഥിര താമസക്കാരായിരിക്കണം എന്നതാണ് ഇതിലെ ഒരു നിബന്ധന. എന്നാല്‍ പൗരത്വത്തിനായുള്ള അപേക്ഷകരില്‍ ചിലർക്ക് ഇളവ് അനുവദിച്ചിട്ടുണ്ട്. യുഎസ് പൗരത്വമുള്ള ജീവിത പങ്കാളി ഉണ്ടാവുകയോ അല്ലെങ്കില്‍ പട്ടാളത്തില്‍ ജോലി ചെയ്യുകയോ ചെയ്തവർക്ക് ഇളവ് ലഭിക്കും.
കഴിഞ്ഞ വർഷം പൗരത്വം നേടിയവരില്‍ ഏറെപ്പേരും അഞ്ച് വർഷത്തിലധികം സ്ഥിര താമസക്കാരായ വ്യക്തികളായിരുന്നുവെന്ന് ഇമിഗ്രേഷൻ സർവീസ് റിപ്പോർട്ട് ചൂണ്ടിക്കാട്ടുന്നു
