ശ്രദ്ധിക്കുക! ട്രെയിൻ ടിക്കറ്റ് റദ്ദാക്കാൻ ഇനി പുതിയ സമയക്രമം
ട്രെയിൻ ടിക്കറ്റ് റീഫണ്ട് നിയമങ്ങളിൽ നിർണ്ണായക മാറ്റങ്ങളുമായി ഇന്ത്യൻ റെയിൽവേ. ടിക്കറ്റ് റദ്ദാക്കുന്നത് വൈകിയാൽ യാത്രക്കാർക്ക് വലിയ തുക നഷ്ടമാകുന്ന രീതിയിലാണ് പുതിയ ക്രമീകരണം. ഏപ്രിൽ 15-ഓടെ പുതിയ നിയമങ്ങൾ നിലവിൽ വരുമെന്ന് റെയിൽവേ മന്ത്രി അശ്വിനി വൈഷ്ണവ് അറിയിച്ചു.
തീവണ്ടി പുറപ്പെടുന്നതിന് 72 മുതൽ 24 മണിക്കൂർ മുൻപുവരെ റദ്ദാക്കിയാൽ ടിക്കറ്റ് നിരക്കിന്റെ 25 ശതമാനം തുക നഷ്ടമാകും. 24 മുതൽ 8 മണിക്കൂർ വരെ റദ്ദാക്കിയാൽ 50 ശതമാനം തുക നഷ്ടമാകും. 8 മണിക്കൂറിനകത്താണ് റദ്ദാക്കുന്നതെങ്കിൽ മുഴുവൻ തുകയും നഷ്ടമാകും. നിലവിൽ 4 മണിക്കൂർ മുൻപ് വരെ റദ്ദാക്കാമായിരുന്ന സൗകര്യമാണ് ഇപ്പോൾ 8 മണിക്കൂർ ആക്കി ഉയർത്തിയത്.
ട്രെയിൻ പുറപ്പെടുന്നതിന് അരമണിക്കൂർ മുൻപ് വരെ ഇനി ബോർഡിങ് സ്റ്റേഷൻ മാറ്റാൻ സാധിക്കും. കൗണ്ടർ ടിക്കറ്റ് എടുത്തവർക്ക് വണ്ടി പുറപ്പെടുന്നതിന് അരമണിക്കൂർ മുൻപ് വരെ യാത്രാ ക്ലാസ് മാറ്റാം. കൗണ്ടർ വഴി എടുത്ത റിസർവേഷൻ ടിക്കറ്റുകൾ ഇനി രാജ്യത്തെ ഏത് സ്റ്റേഷനിൽ നിന്നും റദ്ദാക്കാം. നിലവിൽ യാത്ര അവസാനിക്കുന്ന സ്റ്റേഷനിൽ മാത്രമേ ഈ സൗകര്യം ഉണ്ടായിരുന്നുള്ളൂ.
