ഗാസ സമാധാന കരാർ ഒപ്പിടൽ ഉച്ചകോടി; ഈജിപ്തിലേക്ക് തിരിച്ച മൂന്ന് ഖത്തര്‍ നയതന്ത്രജ്ഞര്‍ വാഹനാപകടത്തില്‍ മരിച്ചു
കെയ്‌റോ: ഹമാസ് - ഇസ്രായേൽ വെടിനിർത്തൽ കരാർ ഒപ്പിടല്‍ ഉച്ചകോടിക്ക് ഈജിപ്തിലെത്തിയ മൂന്ന് ഖത്തർ നയതന്ത്രജ്ഞർ വാഹനാപകടത്തിൽ മരിച്ചു. ഈജിപ്തിലെ ഷാം എൽ ഷൈഖിലേക്ക് പോകുന്നതിനിടെ ശനിയാഴ്ചയുണ്ടായ വാഹനാപകടത്തിലാണ് നയതന്ത്രജ്ഞർ കൊല്ലപ്പെട്ടത്. ഖത്തറിലെ ഉന്നത സർക്കാർ സ്ഥാപനമായ അമീരി ദിവാന്റെ ജീവനക്കാരായിരുന്നു നയതന്ത്രജ്ഞർ. ഖത്തർ പ്രോട്ടോക്കോൾ ടീമിൽ നിന്നുള്ള നയതന്ത്രജ്ഞരാണ് ഇവർ.
രണ്ട് നയതന്ത്രജ്ഞർക്ക് അപകടത്തിൽ പരിക്കേറ്റിട്ടുണ്ട്. ഇവരെ നഗരത്തിലെ ആശുപത്രിയിൽ പ്രവേശിപ്പിച്ചതായി കെയ്‌റോയിലെ ഖത്തർ എംബസി അറിയിച്ചു. ഷാം എൽ ഷൈഖിൽ നിന്ന് ഏകദേശം 50 കിലോമീറ്റർ അകലെവച്ചാണ് അപകടം സംഭവിച്ചതെന്ന് അധികൃതർ അറിയിച്ചു. അപകടത്തിൻ്റെ കാരണം എന്താണെന്ന് ഇതുവരെ വ്യക്തമായിട്ടില്ല.
അതിനിടെ. ഗസ്സയിലെ സമാധാന പ്രഖ്യാപനത്തിനായി യു എസ് പ്രസിഡന്റ് ഡൊണാള്‍ഡ് ട്രംപ് പശ്ചിമേഷ്യയിലേക്ക് തിരിച്ചു. ഈജിപ്തും ഇസ്റയേലും ട്രംപ് സന്ദര്‍ശിക്കും. ഇസ്റയേല്‍ പാര്‍ലിമെന്റില്‍ അദ്ദേഹം പ്രസംഗിക്കും. ട്രംപിന്റെ സന്ദര്‍ശനത്തോടെ ബന്ദി കൈമാറ്റം ആരംഭിക്കുമെന്നാണ് സൂചന. വെടിനിര്‍ത്തല്‍ പ്രഖ്യാപിക്കപ്പെട്ടതോടെ മാനുഷിക സഹായവുമായി എത്തുന്ന നിരവധി ട്രക്കുകള്‍ ഇന്ന് ഗസ്സയില്‍ പ്രവേശിക്കും
