അമേരിക്ക പാകിസ്ഥാനെ ആക്രമിച്ചാല് പാകിസ്ഥാന് ഇന്ത്യയെ ആക്രമിക്കും; വിചിത്ര മുന്നറിയിപ്പുമായി പാക് നയതന്ത്രജ്ഞന്
അമേരിക്ക പാകിസ്ഥാനെ ആക്രമിക്കുന്ന സാഹചര്യമുണ്ടായാല് പാകിസ്ഥാന് ഇന്ത്യന് നഗരങ്ങളെ ലക്ഷ്യമിടുമെന്ന് ഇന്ത്യയിലെ മുന് പാകിസ്ഥാന് ഹൈക്കമ്മിഷണര് അബ്ദുള് ബാസിത്ത്. അമേരിക്ക പാക്കിസ്ഥാനെ ആക്രമിച്ചാല് ഞങ്ങള്ക്ക് ഇന്ത്യയെ ആക്രമിക്കേണ്ടി വരുമെന്നാണ് അബ്ദുള് ബാസിത്ത് പറഞ്ഞത്.
പാകിസ്ഥാന്റെ മിസൈലുകള് അമേരിക്കയില് എത്തില്ലായെങ്കിലും പാകിസ്ഥാന് മുംബൈയെയും ന്യൂഡല്ഹിയെയും ആക്രമിക്കാനാകുമെന്നാണ് ബാസിത്ത് ഭീഷണി മുഴക്കിയത്. ബാക്കി പിന്നീട് കാണാമെന്നും പാക് നയതന്ത്രജ്ഞന് പറഞ്ഞു.
”അമേരിക്ക പാകിസ്ഥാനെ ആക്രമിച്ചാല് ഞങ്ങള്ക്ക് ഇന്ത്യയെ ആക്രമിക്കേണ്ടി വരും. ഞങ്ങളുടെ മിസൈലുകള് അമേരിക്കയില് എത്തില്ലായിരിക്കാം. പക്ഷേ ഞങ്ങള് മുംബൈയെയും ന്യൂഡല്ഹിയെയും ആക്രമിക്കും. ബാക്കി പിന്നീട് കാണാം”.
ഒരു പ്രാദേശിക ടിവി ചാനലിന് നല്കിയ അഭിമുഖത്തിലാണ് ഇന്ത്യയിലെ മുന് പാകിസ്ഥാന് ഹൈക്കമ്മിഷണര് അബ്ദുള് ബാസിത്തിന്റെ പരാമര്ശം. വര്ദ്ധിച്ചുവരുന്ന പ്രാദേശിക സംഘര്ഷങ്ങള്ക്കിടയില്, മുന് പാകിസ്ഥാന് നയതന്ത്രജ്ഞന്റെ വിവാദ പരാമര്ശം ആശങ്കയ്ക്ക് കാരണമായിട്ടുണ്ട്, ഭൗമരാഷ്ട്രീയ പിഴവുകള് കൂടുതല് വികസിക്കുന്ന സമയത്ത് ഇന്ത്യയെക്കുറിച്ചുള്ള പരാമര്ശങ്ങള് രൂക്ഷമായ പ്രതികരണങ്ങള്ക്ക് കാരണമായിട്ടുണ്ട്.
പാകിസ്ഥാനിലെ ഭീകരവാദ കേന്ദ്രങ്ങള് ലക്ഷ്യമിട്ട് ഇന്ത്യ ‘ഓപ്പറേഷന് സിന്ദൂര്’ നടത്തി മാസങ്ങള് പിന്നിടുമ്പോഴാണ് ഈ വിചിത്ര പ്രസ്താവനയെന്നതും ശ്രദ്ധേയമാണ്. ഒരു സാങ്കല്പ്പിക യുദ്ധസാഹചര്യത്തെക്കുറിച്ചുള്ള ചര്ച്ചയ്ക്കിടെയാണ് ബാസിത്ത് ഇത്തരമൊരു ഭീഷണി മുഴക്കിയത്. അങ്ങനെയൊന്ന് സംഭവിക്കാന് ആഗ്രഹിക്കുന്നില്ലെന്നും അബ്ദുള് ബാസിത്ത് കൂട്ടിച്ചേര്ത്തു. 2014 മുതല് 2017 വരെ ഇന്ത്യയിലെ പാക്കിസ്ഥാന്റെ ഉന്നത നയതന്ത്രജ്ഞനായിരുന്നു അബ്ദുള് ബാസിത്ത്..
