KEAM 2026 ഉദ്യോഗാര്ഥികളുടെ ശ്രദ്ധയ്ക്ക്: മാര്ക്ക് ലിസ്റ്റ് അപ്ലോഡ് ചെയ്യാനുള്ള സമയം നീട്ടി; ഈ തെറ്റുകള് വരുത്തരുത്
തിരുവനന്തപുരം: 2026-27 അധ്യയന വർഷത്തെ എഞ്ചിനീയറിംഗ്, ഫാർമസി (കീം) തുടങ്ങിയ പ്രൊഫഷണൽ കോഴ്സുകളിലേക്ക് അപേക്ഷിച്ച വിദ്യാർഥികൾക്ക് ആശ്വാസവാർത്ത. പ്ലസ് ടു അല്ലെങ്കിൽ തത്തുല്യ പരീക്ഷകളുടെ മാർക്ക് വിവരങ്ങൾ ഓൺലൈനായി സമർപ്പിക്കുന്നതിനുള്ള അവസാന തീയതി ദീർഘിപ്പിച്ചു. മുൻപ് നിശ്ചയിച്ചിരുന്ന ജൂൺ 7-ൽ നിന്ന് ജൂൺ 14 വരെയാണ് തീയതി നീട്ടി നൽകിയതെന്ന് പ്രവേശന പരീക്ഷാ കമ്മീഷണർ അറിയിച്ചിട്ടുണ്ട്.
നിരവധി വിദ്യാർത്ഥികളും രക്ഷിതാക്കളും ആവശ്യപ്പെട്ടതിൻ്റെ അടിസ്ഥാനത്തിൽ ഉന്നത വിദ്യാഭ്യാസ മന്ത്രി റോജി. എം. ജോൺ നൽകിയ നിർദേശത്തിൻ്റെ അടിസ്ഥാനത്തിലാണ് പ്രവേശന പരീക്ഷാ കമ്മീഷണറുടെ നടപടി. സിബിഎസ്ഇ വിദ്യാർഥികളുടെ പുനമൂല്യനിർണയ ഫലം ഇതുവരെ പ്രസിദ്ധീകരിക്കാത്തതിനാലും എല്ലാ വിദ്യാർത്ഥികൾക്കും അവസരം ലഭ്യമാക്കുക എന്ന ഉദ്ദേശത്തോടെയാണ് തീയതി നീട്ടിയിരിക്കുന്നത്.
വിദ്യാര്ഥികള് ശ്രദ്ധയോടെ മാര്ക്ക് അപ്ലോഡ് ചെയ്യണം
അതേസമയം, പ്ലസ് ടു മാർക്ക് അപ്ലോഡ് ചെയ്യുന്ന അവസാന തീയതി നീട്ടിവച്ചേക്കുമെന്ന് കഴിഞ്ഞ ദിവസം സൈലം കരിയർ ഗൈഡ് അൻഡ് വെൽഫെയർ ഓഫിസർ ശ്രീകുമാർ പള്ളിയത്ത് ഇടിവി ഭാരതിനോട് പ്രതികരിച്ചിരുന്നു. മാര്ക്ക് അപ്ലോഡ് ചെയ്യുന്ന സമയത്ത് വിദ്യാര്ഥികള് പിന്തുടരേണ്ട മാര്ഗിര്ദേശങ്ങളെ കുറിച്ചും അദ്ദേഹം വിശദീകരിച്ചു.
ഈ വർഷത്തെ കീം എൻജിനീയറിങ് റാങ്ക് ലിസ്റ്റ് തയ്യാറാക്കുമ്പോൾ പ്ലസ് ടു മാർക്കിനും കീം എൻജിനീയറിങ് സ്കോറിനും തുല്യ പ്രാധാന്യമാണെന്നും രണ്ടുപരീക്ഷകളിലും നല്ല മാർക്ക് നേടിയവർക്കാകും ഉയര്ന്ന റാങ്ക് ലഭിക്കാനുള്ള സാധ്യതയെന്നും അദ്ദേഹം പറഞ്ഞു.
മാര്ക്ക് അപ്ലോഡ് ചെയ്യുമ്പോള് വിദ്യാർഥികൾ വളരെ ശ്രദ്ധയോടെ വിവരങ്ങൾ നൽകണം. നമ്മൾ നൽകുന്ന വിവരങ്ങൾ പിന്നീട് മാറ്റാനുള്ള ഓപ്ഷൻ ഉണ്ടായിരിക്കുന്നതല്ല. അതിനാൽ വിവരങ്ങൾ കൃത്യമായി നൽകണം. എന്നാൽ മാർക്ക് വിവരങ്ങൾ ഉദ്യോഗസ്ഥർക്ക് കൃത്യമായി ലഭിക്കും. റോൾ നമ്പർ ഉപയോഗിച്ച് വിദ്യാർഥികളുടെ പരീക്ഷ ഫലം കൃത്യമായി ലഭിക്കും. എന്നാൽ വിദ്യാർഥികളുടെ വിശദ വിവരങ്ങൾ കൃത്യമായി നൽകണമെന്നും ശ്രീകുമാര് വ്യക്തമാക്കി.
നീറ്റ് പരീക്ഷകൾക്ക് തയ്യാറായി നിൽക്കുന്നവർക്കും അവസരം നൽകുന്നതിന് പ്രത്യേക സൗകര്യം ഒരുക്കിയിട്ടുണ്ട്. നീറ്റ് പരീക്ഷ നീണ്ടുപോകുന്നതിനാൽ അതിന്റെ ഫലം വന്നതിനുശേഷം വിദ്യാർഥികൾക്ക് കീം അനുബന്ധ കാര്യങ്ങൾ ചെയ്യുന്നതിനായുള്ള സൗകര്യങ്ങൾ ഒരുക്കുന്നതിനുള്ള സാധ്യതകൾ ഉണ്ട്. അവസാന നിമിഷത്തെ തിരക്കും സാങ്കേതിക തകരാറുകളും ഒഴിവാക്കാൻ വിദ്യാർഥികൾ എത്രയും വേഗം മാർക്കുകൾ സമർപ്പിക്കാൻ ശ്രദ്ധിക്കണം.
നൽകിയിരിക്കുന്ന വിവരങ്ങൾ കൃത്യമാണെന്ന് ഉറപ്പുവരുത്താൻ മറക്കരുത്. പ്ലസ് ടു മാർക്കിന്റെയും കീം എൻട്രൻസ് മാർക്കിന്റെയും അടിസ്ഥാനത്തിൽ റാങ്ക് നിർണയിക്കും. അതിനുശേഷം വിദ്യാർഥികൾക്ക് കോളജും കോഴ്സുകളും തെരഞ്ഞെടുക്കാൻ സാധിക്കുന്നതാണെന്നും അദ്ദേഹം കൂട്ടിച്ചേര്ത്തു.
കീം 2026 പ്ലസ് ടു മാർക്ക് പ്രവേശന പ്രക്രിയ: മാർക്ക് എങ്ങനെ സമർപ്പിക്കാം?
കീം റാങ്ക് ലിസ്റ്റ് തയ്യാറാക്കുന്നതിനുള്ള പ്ലസ് ടു മാർക്ക് സമർപ്പിക്കുന്നതിനുള്ള ഘട്ടങ്ങൾ ചുവടെ നൽകിരിക്കുന്നു
കീമിൻ്റെ ഔദ്യോഗിക വെബ്സൈറ്റായ cee.kerala.gov.in സന്ദർശിക്കുക
ഹോം പേജിൽ നിന്ന് കീം കാൻഡിഡേറ്റ് പോർട്ടൽ ലിങ്ക് തുറക്കുക.
ശേഷം നിങ്ങളുടെകീം ആപ്ലിക്കേഷൻ നമ്പറും പാസ്വേഡും ഉപയോഗിച്ച് ലോഗിൻ ചെയ്യുക.
ലോഗിൻ ചെയ്തുക്കഴിഞ്ഞാൽ, മെനുവിൽ നിന്ന് എൻജിനീയറിംഗിനായുള്ള മാർക്ക് സമർപ്പിക്കുന്നതിനുള്ള ലിങ്ക് ഉദ്യോഗാർത്ഥികൾക്ക് ആക്സസ് ചെയ്യാൻ കഴിയും.
പ്ലസ് ടു മാർക്ക് സമർപ്പിക്കുക.
മാർക്ക് സമർപ്പിച്ചതിൻ്റെ സ്ഥിരീകരണ റിപ്പോർട്ട് ഡൗൺലോഡ് ചെയ്ത് സുരക്ഷിതമായി സൂക്ഷിക്കുക.
കീം പ്ലസ് ടു മാർക്ക് എൻട്രി 2026: ഏതൊക്കെ വിഷയങ്ങളുടെ മാർക്ക് ചേർക്കണം?
കീം എഞ്ചിനീയറിംഗ് പ്രവേശന പരീക്ഷ എഴുതിയ ഉദ്യോഗാർത്ഥികൾ പ്ലസ് ടുവിൻ്റെയോ തത്തുല്യമായ യോഗ്യതാ പരീക്ഷയുടെയോ മാർക്ക് cee.kerala.gov.in എന്ന വെബ്സൈറ്റ് വഴി സമർപ്പിക്കണം.
ഒരു ഉദ്യോഗാർത്ഥി രസതന്ത്രം(കെമസ്ട്രി) പഠിച്ചിട്ടില്ലെങ്കിൽ അവരുടെ കമ്പ്യൂട്ടർ സയൻസിലെ മാർക്ക് പരിഗണിക്കും.
അവർ രസതന്ത്രമോ(കെമസ്ട്രി) കമ്പ്യൂട്ടർ സയൻസോ പഠിച്ചിട്ടില്ലെങ്കിൽ ബയോടെക്നോളജിയിലെ മാർക്ക് ഉപയോഗിക്കും.
കെമിസ്ട്രി, കമ്പ്യൂട്ടർ സയൻസ്, ബയോടെക്നോളജി എന്നിവ പഠിച്ചിട്ടില്ലെങ്കിൽ, ബയോളജിയിലെ മാർക്ക് പരിഗണിക്കും.
കീം 2026 പ്ലസ് ടു മാർക്ക് എൻട്രി പോർട്ടലിൽ മാർക്കുകളുടെ എഡിറ്റിംഗ്
അതത് ബോർഡുകളിൽ നിന്നുള്ള പ്രവേശന പരീക്ഷാ കമ്മീഷണറുടെ പക്കൽ ഉദ്യോഗാർത്ഥിയുടെ 12 ആം ക്ലാസ് മാർക്ക് ലഭ്യമാണെങ്കിൽ അവ പ്രദർശിപ്പിക്കും. പ്രദർശിപ്പിക്കുന്ന വിശദാംശങ്ങളിൽ ഇവ ഉൾപ്പെടുന്നു
പരീക്ഷാ ബോർഡ്
വിജയിച്ച വർഷം
രജിസ്റ്റർ നമ്പർ
ഉദ്യോഗാർത്ഥികൾ അവരുടെ 12 ആം ക്ലാസ് മാർക്ക് ഷീറ്റിൽ നിന്ന് മുകളിലുള്ള വിശദാംശങ്ങൾ ശരിയാണന്ന് പരിശോധിക്കണം. പ്രദർശിപ്പിച്ചിരിക്കുന്ന മാർക്കുകൾ യഥാർത്ഥ മാർക്കുകളിൽ നിന്ന് വ്യത്യസ്തമാണെങ്കിൽ 'മാറ്റുക' എന്ന ബട്ടൺ ഉപയോഗിച്ച് ഉദ്യോഗാർത്ഥികൾക്ക് അവ എഡിറ്റ് ചെയ്യാൻ കഴിയും. മാറ്റങ്ങളൊന്നും ആവശ്യമില്ലെങ്കിൽ വിദ്യാർത്ഥികൾക്ക് അവരുടെ മാർക്ക് അപ്ലോഡ് ചെയ്യേണ്ട ആവശ്യമില്ല.
ബോർഡുകളിൽ നിന്നുള്ള മാർക്ക് ബന്ധപ്പെട്ട ഉദ്യോഗസ്ഥർക്ക് ലഭിച്ചില്ലങ്കിൽ വിദ്യാർത്ഥികൾ അവരുടെ പ്ലസ് ടു മാർക്കുകൾ സ്വയം നൽകണം. അത്തരം സന്ദർഭങ്ങളിൽ, പ്ലസ് ടു മാർക്ക് ഷീറ്റുകളുടെ സ്ഥിരീകരണവും അപ്ലോഡും (പിഡിഎഫ് ഫോർമാറ്റിൽ) ആവശ്യമാണ്. അപ്ലോഡ് ചെയ്യുന്ന വിവരങ്ങൾ പൂർണ്ണവും, വായിക്കാൻ കഴിയുന്നതും, തെറ്റുകൾ ഇല്ലാത്തതുമായിരിക്കണം.
കീം റാങ്ക് ലിസ്റ്റ് 2026 തയ്യാറെടുപ്പിനായി പ്ലസ് ടു മാർക്കുകൾ എങ്ങനെ ഉപയോഗിക്കും?
എഞ്ചിനീയറിംഗ് പ്രവേശനത്തിനുള്ള കീം റാങ്ക് ലിസ്റ്റ് തയ്യാറാക്കുന്നതിന് സ്റ്റാൻഡേർഡൈസേഷൻ നടപടിക്രമം നടപ്പിലാക്കിയ ശേഷം 2026 ലെ എഞ്ചിനീയറിംഗ് പ്രവേശന പരീക്ഷയിൽ ലഭിച്ച നോർമലൈസ്ഡ് സ്കോറിനും ബാധകമായ വിഷയങ്ങൾക്ക് യോഗ്യതാ പരീക്ഷയുടെ അവസാന വർഷത്തിൽ ലഭിച്ച ഗ്രേഡ്/മാർക്കിനും 50:50 എന്ന തുല്യ വെയ്റ്റേജ് നൽകും. അതിനുശേഷമാണ് റാങ്കുകൾ പ്രസിദ്ധികരിക്കുന്നത്
