രാജ്യത്തെ നടുക്കി അജിത് പവാറിന്റെ വിയോഗം: വിടവാങ്ങിയത് മഹാരാഷ്ട്ര രാഷ്ട്രീയത്തിലെ കരുത്തൻ

മഹാരാഷ്ട്ര ഉപമുഖ്യമന്ത്രിയും എൻസിപി അധ്യക്ഷനുമായ അജിത് പവാർ (66) വിമാനാപകടത്തിൽ അന്തരിച്ചു. ബുധനാഴ്ച രാവിലെ ബാരാമതി വിമാനത്താവളത്തിൽ ലാൻഡിംഗിനിടെ അദ്ദേഹം സഞ്ചരിച്ചിരുന്ന വിമാനം തകർന്നു വീഴുകയായിരുന്നു.

മഹാരാഷ്ട്ര രാഷ്ട്രീയത്തിലെ ഏറ്റവും സ്വാധീനമുള്ള നേതാക്കളിൽ ഒരാളുടെ അപ്രതീക്ഷിത വിയോഗം രാജ്യത്തെയാകെ നടുക്കിയിരിക്കുകയാണ്. മുംബൈയിൽ നിന്ന് ബാരാമതിയിലെ തിരഞ്ഞെടുപ്പ് പ്രചാരണ പരിപാടികളിൽ പങ്കെടുക്കാൻ എത്തിയതായിരുന്നു അദ്ദേഹം. വിമാനത്തിലുണ്ടായിരുന്ന പൈലറ്റുമാരും സുരക്ഷാ ഉദ്യോഗസ്ഥരും ഉൾപ്പെടെയുള്ളവർ അപകടത്തിൽ കൊല്ലപ്പെട്ടതായാണ് റിപ്പോർട്ട്. സംഭവ സ്ഥലത്തു നിന്നുള്ള നടുക്കുന്ന കൂടുതൽ ദൃശ്യങ്ങൾ ഇപ്പോൾ പുറത്തു  വന്നുകൊണ്ടിരിക്കുന്നു .

1959 ജൂലൈ 22-ന് അഹമ്മദ്‌നഗറിലെ ദേവ്ലാലി പ്രവരയിൽ ജനിച്ച അജിത് പവാർ, സഹകരണ പ്രസ്ഥാനങ്ങളിലൂടെയാണ് രാഷ്ട്രീയത്തിന്റെ ബാലപാഠങ്ങൾ അഭ്യസിച്ചത്. ശരദ് പവാറിന്റെ അനന്തരവൻ എന്ന നിലയിൽ രാഷ്ട്രീയത്തിൽ പ്രവേശിച്ചെങ്കിലും സ്വന്തം പ്രയത്നം കൊണ്ട് മഹാരാഷ്ട്രയിലെ കരുത്തനായ നേതാവായി അദ്ദേഹം വളർന്നു.

സംസ്ഥാനത്തിന്റെ സാമ്പത്തിക കാര്യങ്ങളിലും ഭരണനിർവ്വഹണത്തിലും അജിത് പവാറിനുള്ള അസാധാരണമായ അറിവ് അദ്ദേഹത്തിന് 'ദാദ' എന്ന വിളിപ്പേര് നേടിക്കൊടുത്തു. വിവിധ സർക്കാരുകളിലായി ഏറ്റവും കൂടുതൽ കാലം ഉപമുഖ്യമന്ത്രി പദം അലങ്കരിച്ച റെക്കോർഡും അദ്ദേഹത്തിന് സ്വന്തമാണ്.

1991-ൽ ബാരാമതിയിൽ നിന്ന് ലോക്‌സഭയിലേക്ക് തിരഞ്ഞെടുക്കപ്പെട്ടെങ്കിലും അമ്മാവൻ ശരദ് പവാറിന് വേണ്ടി ആ സീറ്റ് ഒഴിഞ്ഞുകൊടുത്തു. പിന്നീട് നിയമസഭയിലേക്ക് ശ്രദ്ധ കേന്ദ്രീകരിച്ച അദ്ദേഹം ബാരാമതി മണ്ഡലത്തെ ദശാബ്ദങ്ങളോളം പ്രതിനിധീകരിച്ചു. ജലസേചനം, ധനകാര്യം, ഗ്രാമവികസനം എന്നീ വകുപ്പുകൾ കൈകാര്യം ചെയ്തപ്പോൾ അദ്ദേഹം നടപ്പിലാക്കിയ ഭരണപരിഷ്കാരങ്ങൾ ശ്രദ്ധേയമായിരുന്നു.

കഠിനാധ്വാനിയായ ഭരണാധികാരി എന്ന നിലയിൽ പുലർച്ചെ മുതൽ ഔദ്യോഗിക യോഗങ്ങളിൽ പങ്കെടുക്കുന്ന ശൈലിയായിരുന്നു അദ്ദേഹത്തിന്റേത്.

അജിത് പവാറിന്റെ രാഷ്ട്രീയ യാത്ര പ്രതിസന്ധികളും വിവാദങ്ങളും നിറഞ്ഞതായിരുന്നു. പലപ്പോഴും സഖ്യകക്ഷികളെയും രാഷ്ട്രീയ സമവാക്യങ്ങളെയും മാറ്റിയെഴുതാൻ അദ്ദേഹത്തിന്റെ തീരുമാനങ്ങൾക്കായി.

എൻസിപിയിലെ പിളർപ്പും പിന്നീട് ബിജെപിയുമായി ചേർന്ന് സർക്കാർ രൂപീകരിച്ചതും ആധുനിക മഹാരാഷ്ട്ര രാഷ്ട്രീയത്തിലെ പ്രധാന വഴിത്തിരിവുകളായിരുന്നു.

അജിത് പവാറിന്റെ വിയോഗം മഹാരാഷ്ട്ര രാഷ്ട്രീയത്തിൽ നികത്താനാവാത്ത ഒരു ശൂന്യതയാണ് സൃഷ്ടിച്ചിരിക്കുന്നത്. സഖ്യകക്ഷികളുടെ കണക്കുകൂട്ടലുകളെയും പ്രാദേശിക രാഷ്ട്രീയത്തെയും നിയന്ത്രിച്ചിരുന്ന ആ വലിയ ശക്തിയാണ് ഇതോടെ ഇല്ലാതായത്. ഭാര്യ സുനേത്ര പവാറും മക്കളായ പാർത്ഥും ജയും അടങ്ങുന്നതാണ് അദ്ദേഹത്തിന്റെ കുടുംബം. അജിത് പവാറിന്റെ മരണത്തിൽ പ്രധാനമന്ത്രി നരേന്ദ്ര മോദി ഉൾപ്പെടെയുള്ള പ്രമുഖ നേതാക്കൾ അനുശോചനം രേഖപ്പെടുത്തി.