കാലിഫോർണിയ കടൽത്തീരത്ത് ഇന്ത്യൻ വംശജരായ രണ്ട് വിദ്യാർത്ഥിനികൾ തിരകളിൽപ്പെട്ട് മരിച്ചു
പ്രസാദ് തീയാടിക്കൽ
കാലിഫോർണിയ: അമേരിക്കയിലെ കാലിഫോർണിയ സംസ്ഥാനത്തെ ബോണി ഡൂൺ (Bonny Doon) ബീച്ചിൽ ഉണ്ടായ അപകടത്തിൽ ഇന്ത്യൻ വംശജരായ രണ്ട് കോളജ് വിദ്യാർത്ഥിനികൾ മരണപ്പെട്ടു. 21 വയസ്സുള്ള ഹർഷിത നായർയും 20 വയസ്സുള്ള മഹിയാൽ സ്രാൻയും ശക്തമായ തിരകളിൽപ്പെട്ടാണ് ജീവൻ നഷ്ടമായത്.
കഴിഞ്ഞ ബുധനാഴ്ച വൈകുന്നേരം അപകടം നടന്നത്. അപകടസാധ്യത കൂടുതലുള്ളതായി അറിയപ്പെടുന്ന ബീച്ചിലെ “കീഹോൾ” എന്ന പാറക്കെട്ടിന് സമീപം ഇരുവരും വിശ്രമിക്കുകയായിരുന്നുവെന്ന് അധികൃതർ അറിയിച്ചു. അതിനിടെ ഉയർന്ന തിരമാലകളും ശക്തമായ കടൽപ്രവാഹവും ഇവരെ കടലിലേക്ക് വലിച്ചിഴക്കുകയായിരുന്നു.
വൈകിട്ട് അഞ്ചുമണിയോടെ ഒരു ദൃക്സാക്ഷി 911-ൽ വിവരം അറിയിച്ചതിനെ തുടർന്ന് വിവിധ രക്ഷാസേനകളും നിയമസംരക്ഷണ ഏജൻസികളും ചേർന്ന് വ്യാപകമായ രക്ഷാപ്രവർത്തനം ആരംഭിച്ചു. രക്ഷാപ്രവർത്തകർ ഇരുവരെയും കണ്ടെത്തി കരയിലെത്തിച്ചെങ്കിലും ഗുരുതരാവസ്ഥയിലായിരുന്നു.
ഹർഷിത നായരെ ഹെലികോപ്റ്റർ വഴി ആശുപത്രിയിലേക്ക് മാറ്റിയെങ്കിലും രക്ഷിക്കാനായില്ല. മഹിയാൽ സ്രാനെ അതീവ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചെങ്കിലും ശനിയാഴ്ച മരണത്തിന് കീഴടങ്ങി.
രക്ഷാപ്രവർത്തകർ പറയുന്നതനുസരിച്ച്, കണ്ടെത്തുമ്പോൾ ഇരുവരും ജീവനോടെയുണ്ടായിരുന്നു. സിപിആർ ഉൾപ്പെടെയുള്ള അടിയന്തര ചികിത്സ നൽകിയെങ്കിലും ജീവൻ രക്ഷിക്കാനായില്ല. ഉയർന്ന തിരമാലകൾ വളരെ വേഗത്തിൽ ആളുകളെ കുടുക്കുകയോ കടലിലേക്ക് വലിച്ചിഴക്കുകയോ ചെയ്യുന്ന അത്യന്തം അപകടകരമായ പ്രദേശമാണ് “കീഹോൾ” മേഖലയെന്ന് അധികൃതർ മുന്നറിയിപ്പ് നൽകി.
ഹർഷിത നായർ യൂണിവേഴ്സിറ്റി ഓഫ് കാലിഫോർണിയ ബെർകെലിയിൽ ലീഗൽ സ്റ്റഡീസ് വിദ്യാർത്ഥിനിയായിരുന്നു. മഹിയാൽ സ്രാൻ സാൻ ജോസേ സ്റ്റേറ്റ് യൂണിവേഴ്സിറ്റിയിൽ പബ്ലിക് ഹെൽത്ത് പഠിച്ചുവരികയായിരുന്നു. ഇരുവരും കാലിഫോർണിയയിലെ വാഷിങ്ടൺ ഹൈസ്കൂളിലെ പൂർവവിദ്യാർത്ഥിനികളായിരുന്നു.
