തൃശൂരിലെ തോല്‍വിക്ക് കാരണം ബിജെപി - സിപിഎം ഗൂഢാലോചന: വി ഡി സതീശൻ
തിരുവനന്തപുരം: ബിജെപി- സിപിഎം ഗൂഢാലോചനയാണ് തൃശ്ശൂരില്‍ കോണ്‍ഗ്രസ് സ്ഥാനാ‍ത്ഥി കെ മുരളീധരന്റെ അപ്രതീക്ഷിത തോല്‍വിക്ക് കാരണമെന്ന് പ്രതിപക്ഷ നേതാവ് വി ഡി സതീശൻ.
ആലത്തൂരിലെ തോല്‍വി ചെറിയ വോട്ടിനാണ്. സർക്കാർ വീഴ്ചകള്‍ തുറന്ന് കാണിക്കാനായി. ദേശീയ തലത്തില്‍ തിളക്കമായ മുന്നേറ്റമാണുണ്ടായത്. സിപിഎം – ബിജെപി അവിഹിത ബന്ധം നിയമസഭ തെരഞ്ഞെടുപ്പില്‍ തുടങ്ങിയതാണ്. പ്രകാശ് ജാവദേക്കർ എന്തിനാണ് എല്‍ഡിഎഫ് കണ്‍വീനർ ഇപി ജയരാജനുമായും മുഖ്യമന്ത്രിയുമായും നിരന്തര കൂടിക്കാഴ്ച നടത്തിയത്.
സർക്കാരിനെ ജനങ്ങള്‍ വെറുക്കുന്നു എന്നാണ് വ്യക്തമാകുന്നത്.മുഖ്യമന്ത്രിയുടെ സിഎഎ പ്രചരണം ഏറ്റില്ല. പിണറായി വിജയൻ മുസ്ലിം വിഭാഗത്തെ കബളിപ്പിക്കുകയായിരുന്നു. തൃശൂരിലെ സംഘടന വീഴ്ച പരിശോധിക്കും. തൃശൂരില്‍ തോല്‍ക്കാൻ പല കാരണങ്ങള്‍ ഉണ്ട്. കരുവന്നൂർ കേസില്‍ സിപിഎം നേതാക്കള്‍ ഭയത്തിലായിരുന്നു. മുഖ്യമന്ത്രി രാജിവെക്കണമെന്ന് പറയുന്നില്ല. ആത്മ പരിശോധന നടത്തണമെന്നും സതീശൻ പറഞ്ഞു.
യുഡിഎഫിന്റെ ജയത്തില്‍ വോട്ടർമാരെ അഭിനന്ദിക്കുകയാണ്. കേരളത്തിലേത് അഭിമാനമായ ജയമാണെന്നും യുഡിഎഫിന്റെ ഐക്യത്തിന്റെ ജയമാണെന്നും സതീശൻ കൂട്ടിച്ചേർത്തു.
