ഇസ്രായേൽ സർക്കാർ രൂപീകരണം : നെതന്യാഹുവിന്റെ പാർട്ടിയെ ചർച്ചയ്ക്ക് ക്ഷണിച്ച് ഐസൻകോട്ട്; അറബ് പാർട്ടികളുടെ മോഹം പൊലിയുന്നു;

Nov 22, 2026 - 12:38
 0  0
ഇസ്രായേൽ സർക്കാർ രൂപീകരണം : നെതന്യാഹുവിന്റെ പാർട്ടിയെ ചർച്ചയ്ക്ക് ക്ഷണിച്ച് ഐസൻകോട്ട്;   അറബ് പാർട്ടികളുടെ മോഹം പൊലിയുന്നു;

ജറുസലേം: ഇസ്രായേലിൽ പുതിയ സർക്കാർ രൂപീകരിക്കാൻ ചുമതല ലഭിച്ച ഗാഡി ഐസൻകോട്ട് പ്രധാനമന്ത്രി ബെഞ്ചമിൻ നെതന്യാഹുവിന്റെ വലതുപക്ഷ ലികുഡ് പാർട്ടിയെ പുതിയ സഖ്യ ചർച്ചകൾക്കായി ക്ഷണിച്ചു. ദേശീയ ഐക്യ സർക്കാർ രൂപീകരിക്കുന്നതിലേക്ക് നയിച്ചേക്കാവുന്ന ഒരു നീക്കമാണിത്. ഇന്ന് (നവംബർ 22) ചർച്ചകൾ ആരംഭിക്കും.

നെതന്യാഹുവിനെ മാറ്റി പകരം അധികാരമേൽക്കാൻ പാർലമെന്റിൽ ആവശ്യമായ പിന്തുണ ഉറപ്പാക്കാൻ ഡിസംബർ വരെയാണ് ഐസൻകോട്ടിന് സമയപരിധിയുള്ളത്. വിശാലമായ സർക്കാർ രൂപീകരിക്കാനുള്ള "ആത്മാർത്ഥമായ പ്രതിബദ്ധതയാണ്" നെതന്യാഹുവിന്റെ ലികുഡ് പാർട്ടിയെ ക്ഷണിച്ചതിലൂടെ വ്യക്തമാകുന്നതെന്ന് ഐസൻകോട്ടിന്റെ മധ്യപക്ഷ പാർട്ടിയായ 'യാഷാർ' (Yashar) അറിയിച്ചതായി എഎഫ്‌പി റിപ്പോർട്ട് ചെയ്തു.

ഇസ്രായേൽ സർക്കാർ രൂപീകരണവുമായി ബന്ധപ്പെട്ട പ്രതിസന്ധി പരിഹരിക്കുന്നതിനായി ലികുഡ് പാർട്ടി പ്രതിനിധികളുമായി വിപുലമായ ചർച്ചകൾ നടത്താൻ പാർട്ടിയുടെ ചർച്ചാ സംഘത്തോട് ആവശ്യപ്പെട്ടിട്ടുണ്ട്. നെതന്യാഹുവിനെതിരായ വിശാലമായ രാഷ്ട്രീയ മുന്നണിയെ നയിക്കുന്ന വ്യക്തിയാണ് മുൻ സൈനിക മേധാവി കൂടിയായ ഐസൻകോട്ട് എന്നത് ശ്രദ്ധേയമാണ്. എന്നാൽ ഒക്ടോബറിൽ നടന്ന തെരഞ്ഞെടുപ്പിൽ നെതന്യാഹുവിന്റെ നേതൃത്വത്തിലുള്ള വലതുപക്ഷ സഖ്യത്തിനോ പ്രതിപക്ഷത്തിനോ വ്യക്തമായ ഭൂരിപക്ഷം ലഭിച്ചില്ല. ഇതോടെയാണ് അടുത്ത സർക്കാർ രൂപീകരിക്കാൻ രാഷ്ട്രീയ എതിരാളികൾക്ക് സഖ്യസാധ്യതകൾ തേടേണ്ടിവന്നത്.

നെതന്യാഹുവിന്റെ നേതൃത്വത്തിലുള്ള സർക്കാരിൽ പ്രവർത്തിക്കില്ലെന്ന് ഐസൻകോട്ട് മുൻപ് പലതവണ വ്യക്തമാക്കിയിട്ടുള്ളതിനാൽ അദ്ദേഹത്തിന്റെ ഈ ക്ഷണം ഏറെ പ്രാധാന്യമർഹിക്കുന്നുണ്ട്. താൻ ഇസ്രായേൽ പ്രധാനമന്ത്രിയാവുകയാണെങ്കിൽ ലികുഡ് പാർട്ടി അംഗങ്ങളെ സഖ്യത്തിൽ ഉൾപ്പെടുത്താൻ തയാറാണെന്ന് ഐസൻകോട്ട് സൂചിപ്പിക്കുകയും ചെയ്തു.