ഒഡിഷയിലെ വിവിധ ജില്ലകളിൽ 20 ടണ്ണോളം സ്വർണശേഖരം കണ്ടെത്തി
ഒഡിഷയുടെ വിവിധ ജില്ലകളിൽ സ്വർണ്ണ നിക്ഷേപം കണ്ടെത്തി. ജിയോളജിക്കൽ സർവേ ഓഫ് ഇന്ത്യ (GSI) അടുത്തിടെ നടത്തിയ ധാതു പര്യവേക്ഷണ പദ്ധതികളിലാണ് 20 ടണ്ണോളം സ്വർണ്ണശേഖരം കണ്ടെത്തിയത്.
ഡിയോഘർ, സുന്ദർഗഡ്, നബരംഗ്പൂർ, കിയോഞ്ചർ, അംഗുൽ, കോരാപുട്ട് എന്നിവിടങ്ങളിലാണ് സ്വർണ്ണ ശേഖരം കണ്ടെത്തിയിട്ടുള്ളത്. ഇതിനുപുറമെ, മയൂർഭഞ്ച്, മൽക്കൻഗിരി, സംബൽപൂർ, ബൗദ്ധ് എന്നിവിടങ്ങളിലും പര്യവേക്ഷണ പ്രവർത്തനങ്ങൾ നടക്കുന്നു. 2025 മാർച്ചിൽ, ഒഡിഷ നിയമസഭയിൽ വെച്ച് ഖനി വകുപ്പ് മന്ത്രി ബിഭൂതി ഭൂഷൺ ജെനയാണ് ഈ വിവരങ്ങൾ ഔദ്യോഗികമായി അറിയിച്ചത്.
ഔദ്യോഗിക കണക്കുകൾ ഇതുവരെ പുറത്തുവിട്ടിട്ടില്ല. എങ്കിലും, ഭൗമശാസ്ത്രപരമായ സൂചകങ്ങൾ അടിസ്ഥാനമാക്കി, ഏകദേശം 10 മുതൽ 20 മെട്രിക് ടൺ വരെ സ്വർണ്ണം ഇവിടെ നിന്ന് ലഭിക്കുമെന്നാണ് വിദഗ്ദ്ധർ കണക്കാക്കുന്നത്.
