നീറ്റ് പരീക്ഷാ ക്രമക്കേട്; അടിച്ചമർത്തലല്ല വേണ്ടത്, അടിയന്തിര പരിഹാരം
നീറ്റ് പരീക്ഷാ ചോദ്യപേപ്പർ ചോർന്നതടക്കം പരീക്ഷാ ക്രമക്കേടുകൾക്കെതിരെ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജി ആവശ്യപ്പെട്ടുകൊണ്ട് കോക്രോച്ച് ജനതാ പാർട്ടി(സിജെപി) ഡൽഹിയിൽ നടത്തുന്ന സമരത്തിനു കോൺഗ്രസ് അടക്കം പ്രതിപക്ഷ പാർട്ടികളുടെ പിന്തുണ കൂടി ലഭിച്ചതോടെ രാജ്യതലസ്ഥാനമാകെ സംഘര്ഷഭരിതമായിരിക്കുന്നു.
കോക്രോച്ച് ജനതാ പാർട്ടി എന്ന സിജെപി ഒരു ഓൺലൈൻ തമാശയായിട്ടാണ് തുടങ്ങിയതെങ്കിലും, ഇന്ത്യയിലെ ലക്ഷക്കണക്കിന് അസംതൃപ്തരായ യുവാക്കളുടെ പിന്തുണ ആർജിക്കുന്ന രൂപത്തിൽ അതിപ്പോൾ വളർന്നു കഴിഞ്ഞിരിക്കുന്നു.
തിങ്കളാഴ്ച പൊലീസ് ലാത്തിച്ചാർജിലൂടെ ജന്തർ മന്തറിൽ നിന്നു സിജെപി പ്രക്ഷോഭകരെ ഒഴിപ്പിച്ചെങ്കിലും അവർ വീണ്ടും അവിടെ സമരപ്പന്തൽ ഉയർത്തി പ്രക്ഷോഭം തുടരുകയാണ്. സിജെപിയുടെ പാർലമെന്റ് മാർച്ചിനിടെ പ്രതിഷേധക്കാരും പൊലീസും തമ്മിൽ ഏറ്റുമുട്ടലുണ്ടായിരുന്നു കേരള ഹൗസിനു സമീപം സ്ഥാപിച്ച ബാരിക്കേഡുകൾ മറികടക്കാൻ പ്രക്ഷോഭകർ ശ്രമിച്ചതോടെ പൊലീസ് ലാത്തിവീശുകയായിരുന്നു. പ്രതിഷേധക്കാരെ നിയന്ത്രിക്കാൻ വൻ തോതിൽ സുരക്ഷാ ഉദ്യോഗസ്ഥരെ വിന്യസിച്ചിരുന്നു.
ദശലക്ഷക്കണക്കിനു വിദ്യാര്ഥികളുടെ ഭാവി അനിശ്ചിതത്വത്തിലാക്കിയ നീറ്റ് പരീക്ഷാ ക്രമക്കേടുകള്ക്കെതിരെ രംഗത്തിറങ്ങിയവരെ കായികബലം കൊണ്ട് നേരിടാനാണ് സര്ക്കാര് ശ്രമിക്കുന്നത്. തെരുവിൽ പ്രതിഷേധിച്ച വിദ്യാർത്ഥികൾക്ക് നേരെ അരങ്ങേറിയ പോലീസ് നടപടി അങ്ങേയറ്റം നിർഭാഗ്യകരവും ജനാധിപത്യ വിരുദ്ധവുമാണ്. തങ്ങളുടെ ഭാവി ഇരുളടയുന്നതിൽ ആശങ്കാകുലരായ ഒരു തലമുറയുടെ ന്യായമായ പ്രതിഷേധങ്ങളെ അധികാരക്കരുത്ത് കൊണ്ട് അടിച്ചമർത്താൻ ശ്രമിക്കുന്നത് ഒരു ജനാധിപത്യ സമൂഹത്തിന് ചേർന്നതല്ല.
പരീക്ഷാ ക്രമക്കേടുകൾക്കെതിരെ ജനാധിപത്യപരമായി പ്രതിഷേധിച്ച വിദ്യാർത്ഥി-യുവജന പ്രസ്ഥാനങ്ങൾക്ക് നേരെ പോലീസ് അഴിച്ചുവിട്ട ക്രൂരമായ ലാത്തിച്ചാർജ്ജും അടിച്ചമർത്തലുകളും തികച്ചും പ്രതിഷേധാർഹമാണ്. നീതിക്ക് വേണ്ടി തെരുവിലിറങ്ങിയ യുവതയെ ക്രമസമാധാന പാലനത്തിന്റെ പേരിൽ തല്ലിച്ചതയ്ക്കുന്നത് ജനാധിപത്യ സമൂഹത്തിന് ഒട്ടും ഭൂഷണമല്ല.
പൊതുസുരക്ഷയും ക്രമസമാധാനവും ഉറപ്പാക്കേണ്ടത് സര്ക്കാറിന്റെ ഉത്തരവാദിത്വമാണെന്നതില് സംശയമില്ല. എന്നാല് സമാധാനപരമായ പ്രതിഷേധവും അക്രമാസക്ത സമരവും തിരിച്ചറിയാനുള്ള ഉത്തരവാദിത്വവും സര്ക്കാറിനുണ്ട്.
രാജ്യത്തെ ലക്ഷക്കണക്കിന് മെഡിക്കൽ വിദ്യാർത്ഥികളുടെ സ്വപ്നങ്ങളും അധ്വാനവുമാണ് പരീക്ഷാ ക്രമക്കേടുകളിലൂടെയും ചോദ്യപേപ്പർ ചോർച്ചയിലൂടെയും വഴിമുട്ടി നിൽക്കുന്നത്. മാസങ്ങളായി തുടരുന്ന ഈ അനിശ്ചിതത്വത്തിൽ അധികാരികളുടെ ഭാഗത്തുനിന്ന് കൃത്യമായ ഉറപ്പുകളോ ശാശ്വത പരിഹാരങ്ങളോ ഉണ്ടാകാത്തതിനെ തുടർന്നാണ് വിദ്യാർത്ഥികൾ തെരുവിലിറങ്ങാൻ നിർബന്ധിതരായത്. എന്നാൽ, അവരുടെ ആകുലതകൾ കേൾക്കാനും ന്യായമായ ആവശ്യങ്ങൾ ചർച്ച ചെയ്യാനും തയ്യാറാകാതെ, അധികാരബലം ഉപയോഗിച്ച് ശബ്ദമില്ലാതാക്കാനാണ് ഭരണകൂടം ശ്രമിക്കുന്നത്.
യുവജനങ്ങളുടെ ആശങ്കകൾക്ക് പരിഹാരം കാണേണ്ട സർക്കാർ സംവിധാനങ്ങൾ, അവരെ അക്രമികളായി ചിത്രീകരിച്ച് പോലീസിനെ ഉപയോഗിച്ച് നേരിടുന്നത് യഥാർത്ഥ പ്രശ്നങ്ങളിൽ നിന്ന് ശ്രദ്ധ തിരിക്കാനുള്ള തന്ത്രം മാത്രമാണ്. ചോദ്യപേപ്പർ മാഫിയക്കെതിരെയും പരീക്ഷാ നടത്തിപ്പിലെ വീഴ്ചകൾക്കെതിരെയുമാണ് പോലീസിന്റെയും അന്വേഷണ ഏജൻസികളുടെയും കർശനമായ നടപടികൾ ഉണ്ടാകേണ്ടത്. അതിനുപകരം ഇരകളാക്കപ്പെട്ട വിദ്യാർത്ഥികളെ പ്രതിക്കൂട്ടിലാക്കുന്നത് നീതിന്യായ വ്യവസ്ഥയോടുള്ള വെല്ലുവിളിയാണ്.
ലാത്തികൾക്കും ജലപീരങ്കികൾക്കും വിദ്യാർത്ഥി രോഷത്തെ ദീർഘകാലം അടിച്ചമർത്താനാകില്ലെന്ന് ഭരിക്കുന്നവർ തിരിച്ചറിയണം. ഇനിയെങ്കിലും പരീക്ഷാ നടത്തിപ്പിലെ സുതാര്യത ഉറപ്പാക്കാനും കുറ്റക്കാർക്കെതിരെ മാതൃകാപരമായ നടപടിയെടുക്കാനും സർക്കാർ അടിയന്തിരമായി തയ്യാറാകണം. അല്ലാത്തപക്ഷം, തെരുവിൽ ചിന്തിയ ചോരയ്ക്ക് വരുംദിനങ്ങളിൽ വലിയ രാഷ്ട്രീയ-സാമൂഹിക വില നൽകേണ്ടി വരുമെന്ന കാര്യത്തിൽ സംശയമില്ല.
