പ്രഭാത സവാരിക്കിടെ കുഴഞ്ഞുവീണു; മുൻ ഉപരാഷ്ട്രപതി ജഗ്ദീപ് ധൻകറിനെ എയിംസിൽ പ്രവേശിപ്പിച്ചു
പ്രഭാത സവാരിക്കിടെ കുഴഞ്ഞുവീണതിനെ തുടർന്ന് മുൻ ഉപരാഷ്ട്രപതി ജഗ്ദീപ് ധൻകറിനെ ഡൽഹിയിലെ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിൽ (എയിംസ്) പ്രവേശിപ്പിച്ചു. ആശുപത്രിയിലെ കാർഡിയോ-ന്യൂറോ സെന്ററിലാണ് അദ്ദേഹത്തെ വൈദ്യപരിശോധനയ്ക്ക് വിധേയനാക്കുന്നത്.
ബുധനാഴ്ച പ്രഭാത നടത്തത്തിനിടെ ബോധരഹിതനായി വീണ 75-കാരനായ മുൻ ഉപരാഷ്ട്രപതിയുടെ ആരോഗ്യനില ആശങ്ക ഉയർത്തിയതിനെ തുടർന്നാണ് ആംബുലൻസിൽ ആശുപത്രിയിലെത്തിച്ചതെന്ന് വാർത്താ ഏജൻസിയായ പിടിഐ വൃത്തങ്ങളെ ഉദ്ധരിച്ച് റിപ്പോർട്ട് ചെയ്തു.
അദ്ദേഹത്തിന്റെ ആരോഗ്യനിലയെക്കുറിച്ചുള്ള കൂടുതൽ വിവരങ്ങൾ ലഭ്യമായിട്ടില്ല. വാർത്ത വരുമ്പോൾ എയിംസ് അധികൃതർ ഔദ്യോഗിക പ്രസ്താവന പുറപ്പെടുവിച്ചിട്ടില്ല. വിവരങ്ങൾ അനുസരിച്ച്, ബുധനാഴ്ച പ്രഭാത നടത്തത്തിനിടെ കുഴഞ്ഞുവീണ ധൻകർ ഏതാനും മിനിറ്റുകളോളം ബോധരഹിതനായി കിടന്നു. ഉടൻതന്നെ അദ്ദേഹത്തോടൊപ്പമുണ്ടായിരുന്ന സുരക്ഷാ ഉദ്യോഗസ്ഥർ പോലീസ് കൺട്രോൾ റൂം വാഹനത്തിൽ അദ്ദേഹത്തെ വീട്ടിലെത്തിച്ചു. തുടർന്ന് ഐഎൽബിഎസ് മെഡിക്കൽ സംഘവും എയിംസിലെ ഡോക്ടർ സന്ദീപ് സേതും അദ്ദേഹത്തെ പരിശോധിച്ച് പ്രാഥമിക ചികിത്സ നൽകി.
എങ്കിലും ആരോഗ്യനിലയിൽ ആശങ്ക നിലനിന്നതിനാൽ ധൻകറെ ആംബുലൻസിൽ എയിംസിലേക്ക് മാറ്റുകയായിരുന്നുവെന്ന് വൃത്തങ്ങൾ അറിയിച്ചു
