കൊച്ചി സിനഗോഗിന് സമീപത്തെ തീപിടിത്തം: സുരക്ഷാ ചുമതലയിലുണ്ടായിരുന്ന പോലീസ് ഉദ്യോഗസ്ഥന് സസ്പെൻഷൻ
എറണാകുളം മാർക്കറ്റിലെ കടവുഭാഗം സിനഗോഗിന് മുൻവശത്തുണ്ടായ തീവെയ്പ്പ് സംഭവവുമായി ബന്ധപ്പെട്ട് ഇവിടെ സുരക്ഷാ ചുമതലയിലുണ്ടായിരുന്ന പോലീസ് ഉദ്യോഗസ്ഥന് സസ്പെൻഷൻ. പശ്ചിമേഷ്യൻ സംഘർഷങ്ങളുടെ പശ്ചാത്തലത്തിൽ സിനഗോഗിന് പ്രത്യേക പോലീസ് സുരക്ഷ ഏർപ്പെടുത്തിയിരുന്നിട്ടും, ഡ്യൂട്ടിയിലുണ്ടായിരുന്ന ഉദ്യോഗസ്ഥന്റെ ഭാഗത്തുനിന്ന് ഗുരുതരമായ വീഴ്ചയുണ്ടായതിനും സംഭവം റിപ്പോർട്ട് ചെയ്യാൻ വൈകിയതിനുമാണ് സസ്പെൻഷൻ. ഡ്യൂട്ടിയിൽ ഉണ്ടായിരുന്ന ഉദ്യോഗസ്ഥന് വീഴ്ചയുണ്ടായെന്ന കണ്ടെത്തലിന്റെ അടിസ്ഥാനത്തിലാണ് നടപടിയെന്ന് ഡിസിപി അരുൺ കെ പവിത്രൻ പറ‍ഞ്ഞു.
പ്രതിയെ വിശദമായി ചോദ്യം ചെയ്യേണ്ടതുണ്ട്. അതിനാല്‍ കസ്റ്റഡിയിൽ വാങ്ങും. ബോസ് എന്ന കോണ്ടാക്റ്റുമായി ഇയാൾ ചാറ്റ് നടത്തിയിട്ടുണ്ട്. ടെലഗ്രാമിലൂടെ ആയിരുന്നു സംഭാഷണങ്ങൾ. സാമ്പത്തിക ഇടപാടുകളും നടന്നിട്ടുണ്ട്. ഇയാളുടെ താമസ സ്ഥലത്ത് നടത്തിയ പരിശോധനയിൽ ലഹരി കണ്ടെത്തിയിട്ടുണ്ട്. മൂവാറ്റുപുഴയിലെ യൂസ്ഡ് കാർ ഷോ റൂം തീവെപ്പിന് പിന്നിലെ പങ്കാളിത്തം പ്രതിയായ എബിൻ പോൾ സമ്മതിച്ചിട്ടുണ്ടെന്നും പോലീസ് വ്യക്തമാക്കി.
സിനഗോഗിന് തീയിട്ട സംഭവത്തിൽ പ്രതി എബിന്റെ ബോസ് യുഎസിൽ എന്നാണ് പോലീസ് സംശയിക്കുന്നത്. പ്രതി എബിൻ ബി പോളിന് കൃത്യം നിർവഹിക്കാൻ നിർദേശം നൽകിയ ഹാൻഡ്ലറെ കണ്ടെത്താനുള്ള അന്വേഷണം പോലീസ് ഊർജിതമാക്കി. മുമ്പ് മൂവാറ്റുപുഴയിലെ ഒരു ഉപയോഗിച്ച കാറുകൾ വിൽക്കുന്ന ഷോറൂമിന് തീയിടാനും എബിന് നിർദ്ദേശം ലഭിച്ചിരുന്നു.
ക്രിപ്റ്റോകറൻസിയിലൂടെ ഏകദേശം 2000 യുഎസ് ഡോളറാണ് എബിന് പ്രതിഫലമായി ലഭിച്ചത്.
