'ഭാരത് ജോഡോ-2 യാത്ര' കർണാടകയില്‍ ആരംഭിക്കുന്നു
ബെംഗളൂരു: 2023ലെ നിയമസഭാ തെരഞ്ഞെടുപ്പിൽ പരാജയപ്പെട്ട 84 മണ്ഡലങ്ങളിലും കർണാടക കോൺഗ്രസ് രണ്ടാമതൊരു 'ഭാരത് ജോഡോ' പദയാത്ര സംഘടിപ്പിക്കുമെന്ന് സംസ്ഥാന അധ്യക്ഷൻ ബി കെ ഹരിപ്രസാദ്. ഈ മാസം സെപ്റ്റംബർ 30നാണ് യാത്ര ആരംഭിക്കുന്നത്.
2022ലാണ് രാഹുൽ ഗാന്ധിയുടെ ഭാരത് ജോഡോ പദയാത്ര കർണാടകയിൽ നടന്നത്. ഇതിൻ്റെ ഓർമ്മ പുതുക്കൽ കൂടിയാണിതെന്ന് ബികെ ഹരിപ്രസാദ് പറഞ്ഞു. മാധ്യമങ്ങളോട് സംസാരിക്കുകയായിരുന്നു അദ്ദേഹം. ഉച്ചയ്ക്ക് ഒരു മണിക്ക് ആരംഭിക്കുന്ന യാത്ര പൊതുയോഗത്തിന് ശേഷം അവസാനിക്കും. 2023-ൽ പരാജയപ്പെട്ട 84 മണ്ഡലങ്ങളിലും യാത്ര നടത്താനാണ് കോൺഗ്രസ് തീരുമാനിച്ചിരിക്കുന്നത്. രാഹുൽ ഗാന്ധിയുടെ യഥാർത്ഥ ഭാരത് ജോഡോ യാത്ര കടന്നുപോയ 11 ജില്ലകൾക്ക് പുറമെ മറ്റ് 29 ജില്ലകളിലൂടെയും ഈ യാത്ര കടന്നുപോകും.
ഈ മാസം അവസാനം കർണാടകയിലെ ഷിക്കാരിപുരയിലാണ് ആദ്യ യാത്ര നടക്കുക. ശിവമോഗ ജില്ലയിൽ നിന്നുള്ള മന്ത്രിമാരും കോൺഗ്രസ് പ്രവർത്തകരും ഇതിൽ പങ്കെടുക്കുമെന്ന് പ്രതീക്ഷിക്കുന്നു. സമീർ അഹമ്മദ് ഖാൻ, ബിഎൽ ശങ്കർ, മധു ബംഗാരപ്പ എന്നിവരുടെ പേരുകൾ ഹരിപ്രസാദ് പരാമർശിക്കുകയും ചെയ്‌തു. തുടർന്ന്, ഒക്ടോബർ 4 അല്ലെങ്കിൽ 5 മുതൽ പരാജയപ്പെട്ട എല്ലാ ജില്ലകളിലും നിയമസഭാ മണ്ഡലങ്ങളിലും ഇത്തരം പരിപാടികൾ തുടർച്ചയായി സംഘടിപ്പിക്കാൻ പദ്ധതിയിട്ടിട്ടുണ്ടെന്ന് അദ്ദേഹം കൂട്ടിച്ചേർത്തു
