ആകാശക്കൊള്ളയും പ്രവാസികളുടെ കണ്ണീരും
ഉത്സവ സീസണുകൾ എത്തുമ്പോൾ വിമാന ടിക്കറ്റ് നിരക്ക് കുത്തനെ കൂട്ടി യാത്രക്കാരെ പിഴിയുന്ന പതിവ് വിമാനക്കമ്പനികൾ തുടരുകയാണ്. ദീപാവലിക്കും പിന്നാലെ വരുന്ന ക്രിസ്മസ്, പുതുവത്സര ആഘോഷങ്ങൾക്കും നാട്ടിലെത്താൻ കൊതിക്കുന്ന സാധാരണക്കാരായ യാത്രക്കാരാണ് ഈ അന്യായക്കൊള്ളയുടെ പ്രധാന ഇരകൾ.
ആഭ്യന്തര റൂട്ടുകളിൽ പലയിടത്തും അഞ്ചും ആറും മടങ്ങുവരെ നിരക്ക് വർധിപ്പിച്ചതോടെ അന്താരാഷ്ട്ര യാത്രകളെക്കാൾ ചെലവേറിയതായി മാറുന്ന അവസ്ഥയാണുള്ളത്. സമയലാഭം കരുതി വിമാന സർവീസുകളെ ആശ്രയിക്കുന്ന സാധാരണക്കാരുടെ ബജറ്റിനെ പൂർണ്ണമായും തകിടം മറിക്കുന്ന ഈ ചൂഷണം തടയാൻ നിരക്കുകൾക്ക് കൃത്യമായ പരിധി നിശ്ചയിച്ച് അടിയന്തരമായി ഇടപെടാൻ സർക്കാരുകൾ തയ്യാറാകേണ്ടതുണ്ട്.
പ്രവാസി മലയാളികളാണ് ഈ യാത്രാ കൊള്ളയുടെ ഏറ്റവും വലിയ ഇരകൾ . ഓണം, വിഷു, ക്രിസ്മസ് തുടങ്ങി ഏത് അവധിക്കാലമെത്തിയാലും കേരളത്തിലേക്കുള്ള വിമാനക്കമ്പനികളുടെ ചാർജ് കുത്തനെ ഉയരും. ഡൈനമിക് പ്രൈസിങ് രീതിയാണെന്നും അതിനാൽ വിപണിയിലെ ആവശ്യകത അനുസരിച്ചാണ് നിരക്ക് കൂടുന്നതെന്നും പറഞ്ഞ് കേന്ദ്ര സർക്കാർ കൈകഴുകുമ്പോൾ, വിമാന സർവീസുകൾ പൂർണ്ണമായി സ്വകാര്യ മേഖലയിലായതിന്റെ ദുരന്തമാണ് സാധാരണ ജനങ്ങൾ അനുഭവിക്കുന്നത്.
സമയത്തിനു വിലയേറിയ കാലമാണിത്. ദിവസങ്ങളോളം യാത്ര ചെയ്ത് സമയം നഷ്ടപ്പെടുത്താൻ സാധിക്കാത്ത നിരവധിയാളുകൾക്ക് വിമാന സർവീസുകൾ ഒരു അനിവാര്യ സേവനമാണ്. ആഘോഷ വേളകളിൽ നാട്ടിലെത്താൻ ആഗ്രഹിക്കുന്ന പ്രവാസികളുടെയും സാധാരണക്കാരുടെയും കുടുംബ ബജറ്റിനെ ഇത്തരത്തിലുള്ള അമിത നിരക്കുകൾ പൂർണ്ണമായും തകിടം മറിക്കുന്നു.
വരാനിരിക്കുന്ന പുതിയ വ്യോമയാന ചട്ടങ്ങൾ പ്രകാരം പൊതുതാത്പര്യം മുൻനിർത്തി നിരക്കുകളിൽ ഇടപെടാൻ സർക്കാരിന് അധികാരമുണ്ടായിട്ടും ഉത്സവ സീസണുകളിലെ ഈ കഴുത്തറപ്പൻ സമീപനത്തിനെതിരെ ശക്തമായ നടപടികൾ ഉണ്ടാകുമോ എന്നത് സംശയമാണ്.
വിദേശ രാജ്യങ്ങളിൽ സ്വന്തം ജീവൻ പണയം വെച്ച് പണിചെയ്ത് പ്രവാസികൾ അയക്കുന്ന പണംകൊണ്ടാണ് പ്രതിസന്ധികൾക്കിടയിലും നമ്മുടെ സാമ്പത്തിക പ്രവർത്തനങ്ങൾ മുന്നോട്ടുപോകുന്നത്. പ്രവാസികൾക്ക് ആപത്തുകാലത്ത് താങ്ങാകേണ്ട ക്ഷേമപദ്ധതികളും ഇപ്പോൾ തകിടം മറിയുന്ന കാഴ്ചയാണുള്ളത്. 2025-ൽ തുടക്കമിട്ട, 1,32,000 പേർ പ്രതീക്ഷയോടെ ചേർന്ന 'നോർക്ക കെയർ' സമഗ്ര ആരോഗ്യ ഇൻഷുറൻസ് പദ്ധതി ആയിരക്കണക്കിന് പ്രവാസികൾക്ക് വലിയ ആശ്വാസമായി, കാൻസർ ഉൾപ്പെടെയുള്ള ഗുരുതര രോഗ ബാധിതർക്ക് ചികിത്സ ലഭ്യമാക്കാൻ സാധിച്ചിരുന്നു.
എന്നാൽ, കഴിഞ്ഞ വർഷത്തെ ബാധ്യത ചൂണ്ടിക്കാട്ടി ഇക്കുറി പ്രീമിയം തുക കുത്തനെ ഉയർത്തിയത് സാധാരണക്കാരായ പ്രവാസികളെ പദ്ധതിയിൽ നിന്ന് അകറ്റുന്നതിന് തുല്യമാണ്. വരുമാനമാർഗ്ഗം അടഞ്ഞ മനുഷ്യർക്ക് മുന്നിൽ ചികിത്സാ നിഷേധമാണ് ഇതിലൂടെ സംഭവിക്കുന്നത്.
സംസ്ഥാന ജി.ഡി.പി.യുടെ മൂന്നിലൊന്നോളം സംഭാവന ചെയ്യുന്ന, നാടിന്റെ നട്ടെല്ലായ പ്രവാസികളെ ചേർത്ത് നിർത്തേണ്ടതുണ്ട്.പ്രവാസി ഭാരതീയ ദിവസും ലോക കേരളസഭയുമൊക്കെ പ്രവാസി പ്രമുഖരിൽ മാത്രം ഒതുങ്ങിനിൽക്കുമ്പോൾ, സാധാരണക്കാരായ പ്രവാസികളുടെ ജീവിതവും ആരോഗ്യവും സുരക്ഷിതമാക്കാൻ സർക്കാരുകൾ അടിയന്തരമായി ഇടപെട്ടേ തീരൂ. വിമാനക്കമ്പനികളുടെ കൊള്ളയ്ക്ക് തടയിടാനും ഇൻഷുറൻസ് പദ്ധതികൾ താങ്ങാനാകുന്ന പ്രീമിയത്തിൽ തുടരാനും സർക്കാർ തയ്യാറാകണം
