കാഴ്ച :കവിത , റോയ് പഞ്ഞിക്കാരൻ
അപാര സുന്ദര കാഴ്ചകൾ കാണാൻ
അനന്തമാം നീലാകാശത്തിൻ കീഴിൽ
അന്ധനായി നിന്നു ഞാൻ
അനുപമ സുന്ദരമാം കാഴ്ചകൾ കണ്ടു
മാരിവില്ലിനെക്കാൾ മനോഹരമായത്,
ആരും ഒരിക്കലും കാണാത്ത കാഴ്ചകൾ !
ഞാൻ കാണാത്തതൊക്കെയും
കാർമേഘമായി മിന്നലായി
മഴയായി നിങ്ങൾ കണ്ടു .
ഞാൻ തൊട്ടറിയുന്ന കാഴ്ചകൾ
അന്ധതയുടെ മായാജാലം .
കണ്ണുകളിൽ കാഴ്ചയുള്ളവരേക്കാൾ
ഇരുണ്ട കാഴ്ച്ചകൾ .
കണ്ണുകൾ തളരുമ്പോൾ
'പ്രകാശം'ചൊരിയുന്ന എൻ കാതുകൾ.
ഇട നെഞ്ചിൽ മോഹങ്ങൾ വിടരുമ്പോൾ എല്ലാം ഒരുപോലെ.
സ്നേഹം നിറഞ്ഞൊരു നോട്ടം
ഇരുളിൽ കാണുന്നപോലെ,
നിറമില്ല നിഴലില്ല
നനവുള്ള കാഴ്ചകൾ .
റോയ് പഞ്ഞിക്കാരൻ