ഇഡിയ്ക്ക് കനത്ത തിരിച്ചടി; കിഫ്ബി മസാല ബോണ്ടിലെ നോട്ടീസിന് സ്റ്റേ
കൊച്ചി: കിഫ്ബി മസാല ബോണ്ട് ഇടപാടുമായി ബന്ധപ്പെട്ട വിദേശനാണ്യ വിനിമയച്ചട്ട (ഫെമ) ലംഘനക്കേസിൽ മുഖ്യമന്ത്രി പിണറായി വിജയൻ ഉൾപ്പെടെയുള്ളവർക്ക് ഹൈക്കോടതിയുടെ താൽക്കാലിക ആശ്വാസം. കേസിലെ ഇഡി അന്വേഷണവും തുടർനടപടികളും ഹൈക്കോടതി മൂന്നു മാസത്തേക്ക് സ്റ്റേ ചെയ്തു. മുഖ്യമന്ത്രിക്ക് പുറമെ മുൻ ധനമന്ത്രി തോമസ് ഐസക്, കിഫ്ബി സിഇഒ കെ.എം. എബ്രഹാം എന്നിവർക്കും ഈ ആനുകൂല്യം ലഭിക്കും.
നേരത്തെ കിഫ്ബി സമർപ്പിച്ച ഹർജിയിൽ ഹൈക്കോടതി അനുവദിച്ച അതേ സ്റ്റേ ഉത്തരവ് തന്നെയാണ് ജസ്റ്റിസ് വി.ജി. അരുണിന്റെ ബെഞ്ച് മുഖ്യമന്ത്രിക്കും മറ്റുള്ളവർക്കും അനുവദിച്ചത്.
കേസ് പരിഗണിച്ചപ്പോൾ, കിഫ്ബിക്ക് നൽകിയ സ്റ്റേ ഉത്തരവിനെതിരെ ഡിവിഷൻ ബെഞ്ചിനെ സമീപിച്ചിട്ടുണ്ടെന്നും അതിനാൽ മുഖ്യമന്ത്രിയുടെ ഹർജിയിൽ സ്റ്റേ അനുവദിക്കരുതെന്നും എൻഫോഴ്സ്മെന്റ് ഡയറക്ടറേറ്റ് (ഇഡി) വാദിച്ചു. എന്നാൽ, കിഫ്ബിക്ക് നൽകിയ അതേ നീതി തങ്ങൾക്കും വേണമെന്ന മുഖ്യമന്ത്രിയുടെ അഭിഭാഷകന്റെ വാദം കോടതി അംഗീകരിക്കുകയായിരുന്നു.
മസാല ബോണ്ട് വഴി പണം സമാഹരിച്ചതിൽ നിയമലംഘനം നടന്നോ എന്ന ഇഡിയുടെ
