വീണാ ജോർജിനെ ആക്രമിച്ചിട്ടില്ല, അവരുടെ അടുത്തുപോലും എത്തിയില്ല, കെ.എസ്.യു. പ്രവർത്തകർക്കെതിരെ ക്രിമിനൽ നടപടിക്ക് ശുപാർശയില്ലെന്ന് എസ്.ഐ.ടി. റിപ്പോർട്ട്

കണ്ണൂർ: മുൻ ആരോഗ്യവകുപ്പ് മന്ത്രി വീണാ ജോർജിനെ കെ.എസ്.യു. പ്രവർത്തകർ ആക്രമിച്ചിട്ടില്ലെന്ന് വ്യക്തമാക്കി പ്രത്യേക അന്വേഷണ സംഘം റിപ്പോർട്ട് നൽകി. കെ.എസ്.യു. പ്രവർത്തകർക്ക് മന്ത്രിയുടെ അടുത്ത് എത്താൻ പോലും കഴിഞ്ഞില്ലെന്നാണ് റിപ്പോർട്ടിലെ കണ്ടെത്തൽ.

 കരിങ്കൊടി കാണിച്ച സംഭവത്തെ വീണാ ജോർജും ഗൺമാനും പെരുപ്പിച്ചുകാണിച്ച രീതിയിലാണ് കാര്യങ്ങൾ മുന്നോട്ടുപോയതെന്നും റിപ്പോർട്ടിൽ പറയുന്നു.

ശനിയാഴ്‌ച ഉച്ചയ്ക്ക് ഡി.ജി.പി.ക്ക് സമർപ്പിച്ച റിപ്പോർട്ടിൽ, ഗൺമാനെതിരായ നടപടി ഡി.ജി.പി.യുടെ വിവേചനാധികാരം ഉപയോഗിച്ച് സ്വീകരിക്കാവുന്നതാണെന്നും വ്യക്തമാക്കിയിട്ടുണ്ട്. വീണാ ജോർജിൻ്റെ പേരിലും ഗൺമാൻ്റെ പേരിലും കോൺഗ്രസ് നൽകിയ പരാതിയിൽ ക്രിമിനൽ നടപടിക്രമങ്ങൾ നടന്നുവരുന്നതിനാൽ അത്തരം നടപടികൾക്ക് എസ്.ഐ.ടി. ശുപാർശ നൽകിയിട്ടില്ല.

മന്ത്രിക്ക് നേരെ കരിങ്കൊടിയുമായി എത്തിയ കെ.എസ്.യു. പ്രവർത്തകരും പൊലീസും തമ്മിൽ ഉന്തുംതള്ളുമുണ്ടായി. ഇതിനിടയിൽ മന്ത്രിയും ഉൾപ്പെട്ടതോടെയാണ് കഴുത്തിന് വേദനയുണ്ടായത്. സംഭവത്തിന് ശേഷം വീണാ ജോർജ് മൂന്നാം പ്ലാറ്റ്‌ഫോമിലേക്ക് നടന്നുപോകുകയും ചെയ്‌തു. കരിങ്കൊടി പ്രതിഷേധം മാത്രമാണ് നടന്നതെന്നും ആക്രമിച്ചെന്ന ക്രിമിനൽ കേസ് ഗൺമാൻ മൊഴി മാറ്റിയതോടെ നിലനിൽക്കില്ലെന്നും റിപ്പോർട്ടിൽ പറയുന്നു