സോണിയാ ഗാന്ധി മത്സരിക്കുന്നത് ബി.ജെ.പിക്ക് വേണ്ടി; ശ്രദ്ധേയമായി മൂന്നാറിലെ മത്സരം

മൂന്നാറിൽ തദ്ദേശ തിരഞ്ഞെടുപ്പിൽ സോണിയാ ഗാന്ധി എന്ന പേരുള്ള ഒരു യുവതി ബി.ജെ.പി. സ്ഥാനാർഥിയായി മത്സരിക്കുന്നു. 34 വയസ്സുള്ള സോണിയാ ഗാന്ധിയാണ് മൂന്നാർ പഞ്ചായത്തിലെ 16-ാം വാർഡായ നല്ലതണ്ണിയിൽ ബി.ജെ.പി. സ്ഥാനാർഥിയായി ജനവിധി തേടുന്നത്.

കോൺഗ്രസ് അധ്യക്ഷയായിരുന്ന സോണിയാ ഗാന്ധിയോട് ആദരവുള്ള, കോൺഗ്രസ് അനുഭാവിയായിരുന്ന തൻ്റെ അച്ഛനാണ് തനിക്ക് ഈ പേരിട്ടതെന്ന് സ്ഥാനാർഥിയായ സോണിയാ ഗാന്ധി പറയുന്നു. "എൻ്റെ അച്ഛൻ കോൺഗ്രസ് നേതൃത്വത്തിലുള്ള യു.ഡി.എഫിൻ്റെ വലിയ പിന്തുണക്കാരനായിരുന്നു. അതുകൊണ്ടാണ് അദ്ദേഹം എനിക്ക് സോണിയാ ഗാന്ധി എന്ന് പേരിട്ടത്. എൻ്റെ കുടുംബം മുഴുവൻ കോൺഗ്രസ് പാർട്ടിയെ പിന്തുണയ്ക്കുന്നവരാണ്. എൻ്റെ ഭർത്താവ് ബി.ജെ.പിയിലാണ് പ്രവർത്തിക്കുന്നത്, ഞാൻ അദ്ദേഹത്തിന് പിന്തുണ നൽകുന്നു. അതുകൊണ്ടാണ് ഈ സോണിയാ ഗാന്ധി ബി.ജെ.പിക്ക് വേണ്ടി മത്സരിക്കുന്നത്," അവർ പറഞ്ഞു.

സോണിയാ ഗാന്ധിയുടെ ഭർത്താവ് സുഭാഷ് ഒന്നര വർഷം മുമ്പ് പഴയ മൂന്നാർ മൂളക്കടയിൽ നടന്ന പഞ്ചായത്ത് ഉപതിരഞ്ഞെടുപ്പിൽ ബി.ജെ.പി. സ്ഥാനാർത്ഥിയായിരുന്നു. കോൺഗ്രസിൻ്റെ മഞ്ജുള രമേശും സി.പി.എമ്മിൻ്റെ വളർമതിയുമാണ് സോണിയാ ഗാന്ധിയുടെ എതിരാളികൾ.