എസ് ബി- അസംപ്‌ഷൻ കോളേജ് അലുമ്‌നയ്‌ നോർത്ത് അമേരിക്ക: നാഷണൽ കൺവെൻഷൻ 2026 ജൂലൈ 9 ന് ചിക്കാഗോയിൽ
തോമസ് ഡിക്രൂസ്
ചിക്കാഗോ: ചങ്ങനാശേരി സെന്റ് ബെർക്ക്മെൻസ്, അസംപ്‌ഷൻ കോളജുകളിൽ ഉന്നതവിദ്യാഭ്യാസം ചെയ്ത് അമേരിക്കൻ ഐക്യനാടുകളിലേക്ക് കുടിയേറിയ പൂർവ്വവിദ്യാർഥികളുടെ പ്രഥമ ദേശീയ കൺവെൻഷൻ 2026 ജൂലൈ 9 വ്യാഴാഴ്ച്ച ചിക്കാഗോയിൽവച്ച് നടത്തും. ദേശീയതലത്തിൽ ആദ്യമായി സംഘടിപ്പിക്കുന്ന കൺവെൻഷനിൽ, യു എസ്സിലെ എല്ലാ സ്റ്റേറ്റുകളിൽ നിന്നും വിവിധ കാലഘട്ടങ്ങളിൽ പഠിച്ച എസ് ബി, അസംപ്‌ഷൻ അലുമ്‌നയ്‌ കുടുംബസമേതം പങ്കെടുക്കും. വ്യാഴാഴ്ച രാവിലെ ഒൻപതിന് ചിക്കാഗോ സീറോമലബാർ കത്തീഡ്രൽ ഓഡിറ്റോറിയത്തിൽ എസ് ബി കോളേജിന്റെ പൂർവ്വവിദ്യാർഥിയും വത്തിക്കാനിൽ മതാന്തരസംവാദ ഡിക്കസ്റ്ററി പ്രീഫെക്റ്റുമായ കർദ്ദിനാൾ മാർ ജോർജ്ജ് ജേക്കബ് കൂവക്കാട്ട് കൺവെൻഷൻ ഉത്‌ഘാടനം ചെയ്യും. ചങ്ങനാശേരി ആർച്ചു ബിഷപ് മാർ തോമസ് തറയിൽ (രക്ഷാധികാരി) മുഖ്യപ്രഭാഷണം നടത്തും. എസ് ബി കോളേജ് പ്രിൻസിപ്പൽ റവ. ഡോ.റ്റെഡി തോമസ് കാഞ്ഞൂപ്പറമ്പിൽ, അസംപ്‌ഷൻ കോളേജ് പ്രിൻസിപ്പൽ ഡോ. റാണി മരിയ തോമസ്, റവ ഡോ ജോർജ്ജ് മഠത്തിപ്പറമ്പിൽ (മുൻ പ്രിൻസിപ്പൽ) എന്നിവർ അതിഥികളായി പങ്കെടുക്കും.
പ്രമുഖ അലുമ്‌നയ്‌ ആദരം, ഗ്രൂപ്പ് ചർച്ചകൾ കലാപരിപാടികൾ എന്നിവ സ്നേഹവിരുന്നോടെ രണ്ടുമണിക്ക് സമാപിക്കുമെന്ന് സംഘടനയുടെ നാഷണൽ കോർഡിനേറ്റർസ് മാത്യു ഡാനിയേൽ, പിന്റോ കണ്ണംപള്ളി എന്നിവർ അറിയിച്ചു. ശതാബ്ദിയും പ്ലാറ്റിനം ജൂബിലിയും പിന്നിട്ട തങ്ങളുടെ മാതൃവിദ്യാലയങ്ങൾക്ക് ചടങ്ങിൽ അലുമ്‌നയ്‌ ആദരം അർപ്പിക്കും.
കൺവെൻഷന്റെ വിജയത്തിനായി പൂർവ്വവിദ്യാർഥികളായ റവ.ഫാ കുര്യൻ നെടുവേലിചാലുങ്കൽ (പ്രൊക്യൂറേറ്റർ, ചിക്കാഗോ രൂപത), റവ. ഷിന്റോ വർഗീസ് (മിനസോട്ട) എന്നിവർ ഉപരക്ഷാധികാരികളും ദയാലു ജോസഫ് (കാലിഫോർണിയ) നാഷണൽ കോർഡിനേറ്ററുമായി പ്രത്യേക സമിതി രൂപീകരിച്ചു. എസ് ബി കോളേജിന്റെ പൂർവ്വവിദ്യാർഥിയായ അഭിവന്ദ്യ തറയിൽ പിതാവിന്റെ നേതൃത്വത്തിൽ നടന്ന ഏകോപനശ്രമങ്ങളുടെ സാക്ഷാത്ക്കാരമായ കൺവെൻഷൻ, കുടുംബസമേതം പങ്കെടുത്തുകൊണ്ട് വൻവിജയമാക്കാൻ നാഷണൽ കൗൺസിൽ എല്ലാവരെയും സ്നേഹപൂർവ്വം ക്ഷണിക്കുന്നു.
പങ്കെടുക്കാനാഗ്രഹിക്കുന്നവർ ദയവായി ബന്ധപ്പെടുക: ഡോ മനോജ് മാത്യു നേര്യംപറമ്പിൽ, പ്രൊഫ. ജെയിംസ് ഓലിക്കര, കാർമൽ തോമസ്, ബോബൻ കളത്തിൽ: 847 345 0280 (ചിക്കാഗോ). ടോം പെരുമ്പായി (646 326 3708), ലീലാ മാരേട്ട് (646 539 8443) പിന്റോ കണ്ണമ്പള്ളി 973 337 7238 (ന്യൂയോർക്ക് & ന്യൂജേഴ്‌സി), ഡോ തോമസ് താന്നിക്കൽ, സജോ ജേക്കബ്:714 472 0813 (കാലിഫോർണിയ), മിസിസ് റോഷൻ ചെറിയാൻ:914 419 6743 (ഹ്യൂസ്റ്റൺ), ജോർജ്ജ് ജോസഫ്: 817 791 1775 (ഡാളസ്), ജോസ്‌കുട്ടി നൈനാപറമ്പിൽ:937 671 6079 (ഫ്ലോറിഡ), അനിൽ അഗസ്റ്റിൻ: 404 484 4295 (അറ്റ്ലാന്റ), നീന പി മുരിക്കൻ, ജോസ്‌കുട്ടി നടക്കപ്പാടം: 847 630 9788 (അരിസോണ), സാം ആന്റോ: 615 243 3312(ടെന്നസി) .
വിശദ വിവരങ്ങൾക്ക്: https://www.sbandassumptionalumniusa.org/
