പോളിങ്ങിൽ കുതിച്ച് കേരളം; രേഖപ്പെടുത്തിയത് 78.20 ശതമാനം പോളിങ്
കേരളത്തിലെ 140 നിയമസഭാ മണ്ഡലങ്ങളിലേക്കും നടന്ന വോട്ടെടുപ്പ് ആവേശകരമായി പൂർത്തിയായി. ഏറ്റവും പുതിയ കണക്കുകൾ പ്രകാരം സംസ്ഥാനത്ത് 78.20 ശതമാനം പോളിംഗാണ് രേഖപ്പെടുത്തിയിരിക്കുന്നത്. 2021-ലെ തിരഞ്ഞെടുപ്പിനെ അപേക്ഷിച്ച് പോളിംഗ് ശതമാനത്തിൽ ഇത്തവണ വർധനവുണ്ടായിട്ടുണ്ട്.
പാലക്കാട് ജില്ലയിലെ ചിറ്റൂർ മണ്ഡലത്തിലാണ് ഏറ്റവും ഉയർന്ന പോളിംഗ് രേഖപ്പെടുത്തിയത്. കോഴിക്കോട്, പാലക്കാട് ജില്ലകളിൽ പോളിംഗ് 80 ശതമാനം കടന്നപ്പോൾ, പത്തനംതിട്ട മണ്ഡലത്തിലാണ് ഏറ്റവും കുറഞ്ഞ വോട്ടിംഗ് ശതമാനം രേഖപ്പെടുത്തിയത്.
സംസ്ഥാനത്തെ 883 സ്ഥാനാർത്ഥികളുടെ വിധി നിർണ്ണയിക്കാൻ 30,471 പോളിംഗ് സ്റ്റേഷനുകളാണ് സജ്ജീകരിച്ചിരുന്നത്. കടുത്ത വേനൽച്ചൂടിനെ പോലും അവഗണിച്ച് വോട്ടർമാർ ബൂത്തുകളിലേക്ക് ഒഴുകുന്ന കാഴ്ചയാണ് ഉടനീളം കാണാൻ സാധിച്ചത്. ആകെ 2.69 കോടി വോട്ടർമാരിൽ 1.38 കോടി സ്ത്രീകളും 1.31 കോടി പുരുഷന്മാരും 277 ട്രാൻസ്ജെൻഡർ വോട്ടർമാരുമാണ് ഇത്തവണ സമ്മതിദാനാവകാശം വിനിയോഗിച്ചത്.
വോട്ടെടുപ്പ് പൂർത്തിയായതോടെ മുന്നണികളെല്ലാം വലിയ വിജയപ്രതീക്ഷയിലാണ്. എൽഡിഎഫ് ഭരണത്തുടർച്ച ഉറപ്പിക്കുമ്പോൾ, യുഡിഎഫ് തരംഗം ആഞ്ഞടിക്കുമെന്നും നൂറിലധികം സീറ്റുകൾ നേടുമെന്നും കെ. സുധാകരനും വി.ഡി. സതീശനും അവകാശപ്പെട്ടു. എന്നാൽ ഉയർന്ന പോളിംഗ് ശതമാനം തങ്ങൾക്ക് അനുകൂലമാണെന്നാണ് സി.പി.എം സംസ്ഥാന സെക്രട്ടറി എം.വി. ഗോവിന്ദൻ പ്രതികരിച്ചത്. കേരളത്തിൽ ഇത്തവണ സർപ്രൈസ് വിജയങ്ങൾ ഉണ്ടാകുമെന്നും തൂക്കുമന്ത്രിസഭയ്ക്ക് സാധ്യതയുണ്ടെന്നും ബിജെപി നേതൃത്വവും അഭിപ്രായപ്പെട്ടു.
23 ദിവസം നീണ്ട വാശിയേറിയ പ്രചാരണങ്ങൾക്കൊടുവിൽ ജനങ്ങൾ നൽകിയ വിധി എന്താണെന്നറിയാൻ ഇനി മെയ് 4 വരെ കാത്തിരിക്കണം. വരും ദിവസങ്ങളിൽ രാഷ്ട്രീയ കേന്ദ്രങ്ങളിൽ വിജയപരാജയങ്ങളെ കുറിച്ചുള്ള കൂട്ടിക്കിഴിക്കലുകൾ സജീവമാകും
