.jpg?#)
കേരളം ആർക്കൊപ്പം? ഭരണം തുടരുമെന്ന് എൽ.ഡി.എഫ്, വിജയം ഉറപ്പെന്ന് യു.ഡി.എഫ്; വിജയ പ്രതീക്ഷയിൽ മുന്നണികൾ
സംസ്ഥാന നിയമസഭ തിരഞ്ഞെടുപ്പിന്റെ ജനവിധി അറിയാൻ മണിക്കൂറുകൾ മാത്രം ബാക്കിനിൽക്കെ, വൻ വിജയപ്രതീക്ഷയിൽ സംസ്ഥാനത്തെ പാർട്ടി നേതാക്കളും സ്ഥാനാർത്ഥികളും. ഏപ്രിൽ ഒമ്പതിന് 140 മണ്ഡലങ്ങളിലേക്കായി നടന്ന തിരഞ്ഞെടുപ്പിന്റെ വോട്ടെണ്ണൽ നാളെയാണ് നടക്കുന്നത്.
സംസ്ഥാനത്ത് ഇതുവരെ കണ്ടതിൽ വച്ച് ഏറ്റവും ശക്തമായ തിരഞ്ഞെടുപ്പ് പ്രചാരണമാണ് ഇത്തവണ നടന്നത്. കേരളം ആർക്കൊപ്പം നിൽക്കുമെന്ന് നാളെ ഉച്ചയോടെ തന്നെ അറിയാനാകും.
സംസ്ഥാനത്ത് എൽ.ഡി.എഫ് മൂന്നാമതും അധികാരത്തിലെത്തുമെന്ന് മന്ത്രി പി.എ മുഹമ്മദ് റിയാസ് പറഞ്ഞു. കോഴിക്കോട് ജില്ലയിലെ ബേപ്പൂർ മണ്ഡലത്തിലാണ് എൽ.ഡി.എഫ് സ്ഥാനാർത്ഥിയായി റിയാസ് മത്സരിച്ചത്.
ഇതേസമയം തിരഞ്ഞെടുപ്പിൽ യു.ഡി.എഫിനെ നയിച്ച പ്രതിപക്ഷ നേതാവ് തന്റെ മണ്ഡലമായ പറവൂരിൽ ഉണ്ടായിരുന്നുവെങ്കിലും മാധ്യമങ്ങളോട് പ്രതികരിക്കാൻ തയ്യാറായില്ല. ഫലം വന്ന ശേഷം പ്രതികരിക്കാമെന്നായിരുന്നു അദ്ദേഹത്തിന്റെ നിലപാട്. യു.ഡി.എഫ് നൂറിലധികം സീറ്റുകൾ നേടി അധികാരത്തിലെത്തുമെന്നും അതിന് സാധിച്ചില്ലെങ്കിൽ രാഷ്ട്രീയ വനവാസത്തിന് പോകുമെന്നും വി.ഡി സതീശൻ തിരഞ്ഞെടുപ്പിന് മുമ്പ് തന്നെ പ്രഖ്യാപിച്ചിരുന്നു.
അതേസമയം, യു.ഡി.എഫ് വിജയം സുനിശ്ചിതമാണെന്ന് മുതിർന്ന കോൺഗ്രസ് നേതാക്കളായ രമേശ് ചെന്നിത്തലയും കെ. മുരളീധരനും ആത്മവിശ്വാസം പ്രകടിപ്പിച്ചു.
എൻഡിഎയ്ക്ക് പിന്തുണ വർദ്ധിക്കുന്നതായി വോട്ടർമാരുടെ അഭിപ്രായങ്ങൾ സൂചിപ്പിക്കുന്നുവെന്ന് കഴക്കൂട്ടം മണ്ഡലത്തിൽ നിന്ന് മത്സരിക്കുന്ന മുൻ കേന്ദ്രമന്ത്രിയും ബിജെപി നേതാവുമായ വി മുരളീധരൻ പറഞ്ഞു. മണ്ഡലത്തിൽ ബിജെപിക്ക് വ്യക്തമായ മുൻതൂക്കമുണ്ടെന്നും എൽഡിഎഫും എൻഡിഎയും തമ്മിലാണ് മത്സരം നടന്നതെന്നും അദ്ദേഹം വ്യക്തമാക്കി.
