ആര്യാ രാജേന്ദ്രന്റെ പ്രവർത്തന കേന്ദ്രം ഇനി കോഴിക്കോട്
മുന്‍ മേയര്‍ ആര്യാ രാജേന്ദ്രന് കോഴിക്കോട് കേന്ദ്രീകരിച്ച് പ്രവര്‍ത്തിക്കാന്‍ സിപിഎം സംസ്ഥാന നേതൃത്വം അനുമതി നല്‍കി . തിരുവനന്തപുരത്ത് നിന്നും പ്രവര്‍ത്തന മണ്ഡലം മാറ്റാന്‍ ആര്യാ രാജേന്ദ്രന് അനുമതി നല്‍കിയതായി പാര്‍ട്ടി സംസ്ഥാന സെക്രട്ടറി എം വി ഗോവിന്ദന്‍ അറിയിച്ചു. നിലവില്‍ ആര്യയുടെ ഭര്‍ത്താവ് സച്ചിന്‍ദേവ് കോഴിക്കോടും ആര്യ തിരുവനന്തപുരത്തുമാണ് പ്രവര്‍ത്തിക്കുന്നത്. ഈ സാഹചര്യത്തില്‍ അവര്‍ ഒരുമിച്ച് കോഴിക്കോട് പ്രവര്‍ത്തിക്കുന്നതാവും ഉചിതമെന്നാണു പാര്‍ട്ടി വിലയിരുത്തുന്നതെന്നും അതിനുള്ള സൗകര്യമൊരുക്കുമെന്നും എം വിഗോവിന്ദന്‍ പറഞ്ഞു.
തലസ്ഥാനത്ത് നിന്നും പ്രവര്‍ത്തന മണ്ഡലം മാറ്റുന്നത് സംബന്ധിച്ച് ആര്യ കുറച്ചുദിവസത്തിനു മുന്‍പ് ജില്ലാ കമ്മിറ്റിക്ക് കത്തു നല്‍കിയിരുന്നു. ഈ അപേക്ഷ ജില്ലാ കമ്മിറ്റി അംഗീകരിച്ച് അന്തിമ അനുമതിക്കായി സംസ്ഥാന നേതൃത്വത്തിന് കൈമാറുകയായിരുന്നു. വ്യക്തിപരമായ കാര്യങ്ങള്‍ ചൂണ്ടിക്കാട്ടിയാണ് ആര്യാ രാജേന്ദ്രന് പാര്‍ട്ടിക്ക് അപേക്ഷ നല്‍കിയത്.
തിരുവനന്തപുരം കോർപറേഷന്റെ 46-ാമത് മേയറായിരുന്ന ആര്യ, 2025ൽ നടന്ന തദ്ദേശ സ്വയംഭരണ തിരഞ്ഞെടുപ്പിൽ മത്സരിച്ചിരുന്നില്ല. കോർപറേഷൻ ഭരണം നഷ്ടമായതിനെ തുടര്‍ന്ന് ആര്യ ഏറെക്കാലം സജീവ പ്രവർത്തന രംഗത്തുനിന്നും മാറിനില്‍ക്കുന്ന സാഹചര്യവും ഉണ്ടായിരുന്നു. നിലവിൽ ഡിവൈഎഫ്ഐ സംസ്ഥാന സെക്രട്ടേറിയറ്റ് അംഗമാണ് ആര്യ
