കര്‍ണാടകയില്‍ എസ്‌ഐആറിന് ശേഷം 1 കോടിയോളം വോട്ടര്‍മാരുടെ പേര് ഒഴിവാക്കി; അന്തിമ പട്ടിക പുറത്ത്
ബെംഗളൂരു: എസ് ഐ ആര്‍ നടപടികള്‍ക്ക് ശേഷം കര്‍ണാടകയിലെ അന്തിമ വോട്ടര്‍ പട്ടിക പ്രസിദ്ധീകരിച്ചു. ഇത് പ്രകാരം സംസ്ഥാനത്തെ അന്തിമ വോട്ടര്‍മാരുടെ എണ്ണം 4,55,00,011 ആണ്. എസ് ഐ ആര്‍ നടപടികള്‍ക്ക് മുന്‍പ് 5,54,32,314 വോട്ടര്‍മാരുണ്ടായിരുന്ന സ്ഥാനത്താണിത്. അതായത് ഏകദേശം 99.32 ലക്ഷം വോട്ടര്‍മാരാണ് എസ് ഐ ആര്‍ നടപടികള്‍ക്ക് ശേഷം വോട്ടര്‍ പട്ടികയില്‍ നിന്ന് പുറത്തായിരിക്കുന്നത്.
1.07 കോടിയിലധികം പേരുകള്‍ ഒഴിവാക്കപ്പെട്ടിരുന്ന കരട് വോട്ടര്‍ പട്ടികയില്‍ നിന്ന്, അന്തിമ പട്ടികയില്‍ 8.64 ലക്ഷം വോട്ടര്‍മാരെ കൂടി ഉള്‍പ്പെടുത്തിയിട്ടുണ്ട്. മണ്ഡലാടിസ്ഥാനത്തിലുള്ള വോട്ടര്‍ പട്ടികകള്‍ ചീഫ് ഇലക്ടറല്‍ ഓഫീസറുടെ വെബ്‌സൈറ്റില്‍ ലഭ്യമാണ്. തിരഞ്ഞെടുപ്പ് കമ്മീഷന്റെ ഇലക്ടറല്‍ സെര്‍ച്ച് പോര്‍ട്ടല്‍ വഴിയും വോട്ടര്‍മാര്‍ക്ക് തങ്ങളുടെ പേര് പട്ടികയിലുണ്ടോ എന്ന് പരിശോധിക്കാവുന്നതാണ്.
പേര് പരിശോധിക്കുന്നതിനായി, വോട്ടര്‍മാര്‍ 'Search by EPIC' എന്നത് തിരഞ്ഞെടുത്ത്, തങ്ങളുടെ വോട്ടര്‍ ഐഡി നമ്പര്‍ നല്‍കണം. തുടര്‍ന്ന് സംസ്ഥാനമായി കര്‍ണാടക തിരഞ്ഞെടുത്ത്, ക്യാപ്ച പൂര്‍ത്തിയാക്കി സെര്‍ച്ച് ബട്ടണില്‍ ക്ലിക്ക് ചെയ്യുക. പോര്‍ട്ടലില്‍ No Result Found (ഫലമൊന്നും കണ്ടെത്തിയില്ല) എന്നാണ് കാണിക്കുന്നതെങ്കില്‍, തങ്ങളുടെ പേര് പട്ടികയില്‍ നിന്ന് നീക്കം ചെയ്യപ്പെട്ടുവെന്നാണ് സൂചിപ്പിക്കുന്നത്.
ഇക്കാര്യം ഉറപ്പിക്കുന്നതിന് മുന്‍പായി, ഔദ്യോഗിക വോട്ടര്‍ പട്ടികയുമായി വിവരങ്ങള്‍ ഒത്തുനോക്കുകയോ തിരഞ്ഞെടുപ്പ് അധികൃതരുമായി ബന്ധപ്പെടുകയോ ചെയ്യേണ്ടതാണ്.
അന്തിമ വോട്ടര്‍ പട്ടികയില്‍ 2.25 കോടിയിലധികം പുരുഷ വോട്ടര്‍മാരും, 2.29 കോടിയിലധികം സ്ത്രീ വോട്ടര്‍മാരും, 2,841 ട്രാന്‍സ്ജെന്‍ഡര്‍ വോട്ടര്‍മാരും ഉള്‍പ്പെടുന്നു. ഇതില്‍ 18-19 വയസ് പ്രായമുള്ള 6.83 ലക്ഷത്തിലധികം യുവ വോട്ടര്‍മാരും 85 വയസ്സിന് മുകളിലുള്ള 3.92 ലക്ഷത്തിലധികം വോട്ടര്‍മാരും ഉള്‍പ്പെടുന്നു.
പരാതികളും ആക്ഷേപങ്ങളും സമര്‍പ്പിക്കാനുള്ള കാലാവധി അവസാനിച്ച സെപ്റ്റംബര്‍ 23-ന് ശേഷം, ഫോം-6 വഴി പേര് ചേര്‍ക്കാന്‍ അപേക്ഷിച്ചവരെ സപ്ലിമെന്ററി പട്ടികകളില്‍ ഉള്‍പ്പെടുത്തും. എസ്‌ഐആര്‍ പ്രക്രിയയ്ക്ക് ശേഷം ഓരോ പാദത്തിലും ഇത്തരം അനുബന്ധ പട്ടികകള്‍ പ്രസിദ്ധീകരിക്കും. പരാതികളും ആക്ഷേപങ്ങളും സമര്‍പ്പിക്കാന്‍ അനുവദിച്ച സമയപരിധിക്കുള്ളില്‍ അപേക്ഷിച്ചവരുടെ പേരുകള്‍ അന്തിമ വോട്ടര്‍ പട്ടികയില്‍ ഉള്‍പ്പെടുത്തിയിട്ടുണ്ട്.
