തിരഞ്ഞെടുപ്പിന് തൊട്ടുമുൻപ് സൗജന്യ വാഗ്ദാനങ്ങൾ; സംസ്ഥാനങ്ങൾക്കെതിരെ വിമർശനവുമായി സുപ്രീം കോടതി
തിരഞ്ഞെടുപ്പിന് തൊട്ടുമുൻപു സംസ്ഥാനങ്ങൾ പ്രഖ്യാപിക്കുന്ന "ഉത്തരവാദിത്തമില്ലാത്ത" സൗജന്യ വാഗ്ദാനങ്ങൾ പൊതുഖജനാവിനെ വലിയ സാമ്പത്തിക പ്രതിസന്ധിയിലാക്കുന്നുവെന്ന് സുപ്രീം കോടതി. വൈദ്യുതി സബ്സിഡിയുമായി ബന്ധപ്പെട്ട ഒരു കേസ് പരിഗണിക്കവെയാണ്, ഇത്തരം തീരുമാനങ്ങളുടെ സമയത്തെയും സാമ്പത്തിക യുക്തിയെയും കോടതി രൂക്ഷമായി വിമർശിച്ചത്.
പല സംസ്ഥാനങ്ങളും ഇതിനകം തന്നെ വരുമാനക്കമ്മി നേരിടുമ്പോൾ, മുൻകൂട്ടിയുള്ള സാമ്പത്തിക ആസൂത്രണമില്ലാതെ വലിയ സബ്സിഡി വാഗ്ദാനങ്ങൾ നൽകുന്നത് എങ്ങനെയെന്ന് കോടതി ചോദിച്ചു.
തിരഞ്ഞെടുപ്പിന് തൊട്ടുമുമ്പ് സൗജന്യ വൈദ്യുതി പദ്ധതി പ്രഖ്യാപിച്ചതിൻ്റെ സാഹചര്യം വിശദീകരിക്കാൻ തമിഴ്നാട് സർക്കാരിനോട് കോടതി ആവശ്യപ്പെട്ടു. അവസാന നിമിഷത്തെ ഇത്തരം പ്രഖ്യാപനങ്ങൾ വൈദ്യുതി വിതരണ കമ്പനികളെ താരിഫ് നിശ്ചയിക്കുന്നതിലും ബജറ്റ് കണക്കുകൂട്ടലുകളിലും വലിയ പ്രതിസന്ധിയിലാക്കുന്നു. നിയന്ത്രണമില്ലാത്ത ഇത്തരം ഉദാരതകൾ രാജ്യത്തിന്റെ മൊത്തത്തിലുള്ള സാമ്പത്തിക വികസനത്തെ ബാധിക്കുമെന്ന് കോടതി മുന്നറിയിപ്പ് നൽകി.
