സംവിധായകന്‍ രഞ്ജിത്തിനെ പ്രത്യേക അന്വേഷണ സംഘം ചോദ്യം ചെയ്ത് വിട്ടയച്ചു
കൊച്ചി | ലൈംഗികാതിക്രമ കേസില്‍ സംവിധായകന്‍ രഞ്ജിത്തിനെ പ്രത്യേക അന്വേഷണ സംഘം ചോദ്യം ചെയ്ത് വിട്ടയച്ചു. അന്വേഷണ സംഘത്തില്‍പ്പെട്ട ഐ ജി പൂങ്കുഴലിയാണ് സംവിധായകനെ ചോദ്യം ചെയ്തത്.
ലൈംഗിക പീഡനക്കേസില്‍ രഞ്ജിത്തിന് ജാമ്യം നല്‍കിയ കോടതി, അന്വേഷണ ഉദ്യോഗസ്ഥന് മുന്നില്‍ ഹാജരാകണമെന്നും അന്വേഷണത്തോട് സഹകരിക്കണമെന്നും രഞ്ജിത്തിന് നിര്‍ദേശം നല്‍കിയിരുന്നു. പാലേരിമാണിക്യം സിനിമയുടെ ഷൂട്ടിങ്ങിന് എത്തിയപ്പോള്‍ രഞ്ജിത്ത് മോശമായി പെരുമാറിയെന്നാണ് ബംഗാളി നടിയുടെ പരാതി.
രഞ്ജിത്തിനെതിരായ പരാതികളില്‍ പരാതിക്കാരില്‍ നിന്നും പ്രത്യേക അന്വേഷണ സംഘം വിവരങ്ങള്‍ ശേഖരിച്ചിരുന്നു. രഞ്ജിത്ത് മോശമായി പെരുമാറിയ കാര്യം മലയാളി സംവിധായകന്‍ ജോഷി ജോസഫിനോട് പറഞ്ഞിരുന്നതായി ബംഗാളി നടി വെളിപ്പെടുത്തിയിരുന്നു. ഇതേത്തുടര്‍ന്ന് പ്രത്യേക അന്വേഷണ സംഘം ജോഷി ജോസഫിനെയും ബന്ധപ്പെട്ട് വിവരങ്ങള്‍ തേടിയിരുന്നു. ബംഗാളി നടിയുടെ പരാതിയില്‍ സ്ത്രീത്വത്തെ അപമാനിച്ചു എന്ന കുറ്റത്തിന് ഐപിസി 354ാം വകുപ്പ് പ്രകാരമാണ് രഞ്ജിത്തിനെതിരെ കേസെടുത്തത്.
ചോദ്യം ചെയ്യലിനായി ഐ ജിയുടെ ഓഫീസിലെത്തിയ രഞ്ജിത്ത് മാധ്യമങ്ങളോട് പ്രതികരിക്കാന്‍ തയ്യാറായില്ല
