പൂക്കളം: കവിത , നന്ദകുമാര്‍ ചൂരക്കാട്
നിറയട്ടെ മനസ്സിലൊരത്തപൂക്കളം-നിറ
മിയലും സ്നേഹത്തിന്‍ വര്‍ണ്ണ പൂക്കളം
ബാല്യത്തിന്നോര്‍മ്മകള്‍ നിറയും പൂക്കളം-പൂവെ
പൊലിചൊല്ലിടും പൊന്നോണ പൂക്കളം
കാടുകള്‍ മലകള്‍ കുന്നുകള്‍,താണ്ടി
കാണായ ദേശങ്ങള്‍ തേടിനടന്നതും
തുമ്പമുക്കൂറ്റികള്‍ തേടിപിടിച്ചതും
പിന്നെയും കാതങ്ങള്‍ കടന്നെത്രയോ-പൂ
വട്ടിനിറക്കുവായോടി നടന്നതും
ആരാദ്യം എന്നോതി പൂക്കളിറുത്തതും-ആരാദ്യം
പൂവട്ടി നിറച്ചേറ്റിയതും
അതിരാവിലെ തുടങ്ങുന്ന നെട്ടോട്ടങ്ങളില്‍-കൂട്ട
രെത്താ വഴികള്‍ തേടി തെണ്ടി നടന്നതും
പ്രകൃതിയെ തൊട്ടുമെല്ലെ വിളിച്ചുണര്‍ത്തി ഓരോ
പൂക്കളങ്ങളൊന്നൊന്നായ് കൂട്ടിവച്ചതും
ചിത്തിരയില്‍ തുളസിയും തെച്ചിയും ചേര്‍ത്തു
നന്ത്യാറും സുഗന്ധിയും നിറഞ്ഞ പൂക്കളം
വിശാഖം നാള്‍ ശംഖുപുഷ്പം
പവിഴമല്ലിയും
അനിഴത്തില്‍ മന്ദാരം, തൊട്ടാര്‍വാടിയും
ചതുരാകൃതിയിലാണല്ലോ മൂല പൂക്കളം -അതില്‍
ചെണ്ടുമല്ലി പൂച്ചെടി ഒടിച്ചുകുത്തികള്‍
പൂക്കളത്തിലേറിയേറി ഉത്രാടം നാളില്‍
തീര്‍ക്കുന്നു നിറമിയലും വര്‍ണ്ണപൂക്കളം
പൂവുക ളോരോന്നായ് മനസ്സിതിലേറ്റി
പ്രണയാര്‍ദ്രമാക്കുന്നു പത്തുദിനങ്ങള്‍
ഇന്നുപൂവട്ടികള്‍ ശൂന്യമാകിലും
മറുനാടന്‍ പൂക്കളങ്ങളേറി വരികിലും
പൂപൊലിയായ് നിറയട്ടെ പൂക്കളം മനസ്സില്‍
പ്രണയാര്‍ദ്ര മാകട്ടെ ഓണസ്മൃതികള്‍
നന്ദകുമാര്‍ ചൂരക്കാട്
