കിം ജോങ്ങ് ഉന്നിനെ പുകഴ്‌ത്തുന്ന പാട്ട് നിരോധിച്ച് ദക്ഷിണ കൊറിയ
ഉത്തര കൊറിയൻ ഏകാധിപതി കിം ജോങ്ങ് ഉന്നിനെ പുകഴ്‌ത്തുന്ന വൈറല്‍ ഗാനമായ 'ഫ്രണ്ട്‌ലി ഫാദർ 'നിരോധിക്കുമെന്ന് ദക്ഷിണ കൊറിയ .
"വീഡിയോ ദക്ഷിണ കൊറിയയ്‌ക്കെതിരായ മാനസിക യുദ്ധവുമായി ബന്ധപ്പെട്ട ഉള്ളടക്കമാണ്. കാരണം ഇത് പുറം ലോകവുമായി ബന്ധപ്പെടാൻ പ്രവർത്തിക്കുന്ന ഒരു ചാനലില്‍ പോസ്റ്റ് ചെയ്‌തതാണ്, മാത്രമല്ല ഇത് പ്രധാനമായും കിമ്മിനെ ഏകപക്ഷീയമായി വിഗ്രഹവല്‍ക്കരിക്കുകയും മഹത്വവത്കരിക്കുകയും ചെയ്യുന്നു."- പ്രസ്താവനയില്‍ പറയുന്നു.
സോഷ്യല്‍ മീഡിയ പ്ലാറ്റ്‌ഫോമുകളില്‍ നിന്ന് ഗാനം എങ്ങനെ തടയുമെന്ന് വ്യക്തമല്ലെങ്കിലും, മ്യൂസിക് വീഡിയോയുടെ 29 ഓളം പതിപ്പുകള്‍ ബ്ലോക്ക് ചെയ്യാൻ അധികൃതർ തീരുമാനിച്ചു. ദക്ഷിണ കൊറിയയുടെ നാഷണല്‍ ഇൻ്റലിജൻസ് സർവീസ് നിരോധനം ആവശ്യപ്പെട്ടതിനെ തുടർന്നാണ് തീരുമാനം. കുട്ടികള്‍ മുതല്‍ സൈനികർ വരെ വ്യത്യസ്ത പശ്ചാത്തലത്തിലുള്ള ഉത്തര കൊറിയക്കാരെയും മെഡിക്കല്‍ സ്റ്റാഫിനെയും ഉള്‍ക്കൊള്ളുന്ന ഗാനം ഉത്തര കൊറിയ കഴിഞ്ഞ മാസമാണ് പുറത്തിറക്കിയത് .
