ഗ്രീൻ കാർഡ് ഉടമകൾക്ക് ആയുഷ്കാലം യുഎസിൽ തുടരാൻ അവകാശമില്ല; മുന്നറിയിപ്പുമായി ജെ ഡി വാൻസ്
അമേരിക്കയിലെ ഗ്രീൻ കാർഡ് ഉടമകൾക്ക് രാജ്യത്ത് തുടരാൻ അനിശ്ചിതകാല അവകാശമില്ലെന്നും ഭരണകൂടത്തിന്റെ വിവേചനാധികാരത്തിൽ അവരെ നാടുകടത്താമെന്നും യുഎസ് വൈസ് പ്രസിഡൻ്റ് ജെഡി വാൻസ് പറഞ്ഞു.
പലസ്തീൻ അനുകൂല പ്രവർത്തനങ്ങളുടെ പേരിൽ കൊളംബിയ യൂണിവേഴ്സിറ്റിയിലെ ഒരു വിദ്യാർത്ഥിയെ നാടുകടത്താനുള്ള സാധ്യതയെക്കുറിച്ച് അഭിപ്രായപ്പെട്ട വാൻസ്, അമേരിക്കൻ പൊതുജനങ്ങൾ ദേശീയ സമൂഹത്തിൽ ആരെ ഉൾപ്പെടുത്താൻ ആഗ്രഹിക്കുന്നു എന്നതിനെക്കുറിച്ചാണ് ആത്യന്തികമായി തീരുമാനമെന്ന് പറഞ്ഞു.
"ഒരു ഗ്രീൻ കാർഡ് ഉടമയെ സംബന്ധിച്ചിടത്തോളം, എനിക്ക് ആ ഗ്രീൻ കാർഡ് ഉടമയെ ഇഷ്ടപ്പെട്ടാലും, അയാൾക്ക് അമേരിക്കൻ ഐക്യനാടുകളിൽ അനിശ്ചിതമായി തുടരാൻ അവകാശമില്ല," ഫോക്സ് ന്യൂസിന് നൽകിയ അഭിമുഖത്തിൽ വൈസ് പ്രസിഡന്റ് പറഞ്ഞു.
തങ്ങള്‍ അഭിപ്രായ സ്വാതന്ത്ര്യത്തേക്കാള്‍ പ്രാധാന്യം നല്‍കുന്നത് രാജ്യ സുരക്ഷയ്ക്കാണ്. അമേരിക്കന്‍ സമൂഹത്തിന്റെ ഭാഗമാക്കി ആരെ ഉള്‍പ്പെടുത്തണമെന്ന് അമേരിക്കയിലെ ജനങ്ങള്‍ തീരുമാനിക്കുമെന്നും വാന്‍സ് കൂട്ടിച്ചേര്‍ത്തു.
യുഎസില്‍ വിദേശികള്‍ക്ക് ജോലി ചെയ്യാനും സ്ഥിരതാമസത്തിനുമായി അനുവദിക്കുന്നതാണ് ഗ്രീന്‍കാര്‍ഡ്. എന്നാല്‍ ഡൊണാള്‍ഡ് ട്രംപ് ആദ്യം അധികാരത്തിലെത്തുമ്പോള്‍ മുതല്‍ കുടിയേറ്റ വിഷയങ്ങളില്‍ കടുത്ത നിയന്ത്രണങ്ങള്‍ ഏര്‍പ്പെടുത്തിയിരുന്നു. പ്രതിവര്‍ഷം 11 ലക്ഷത്തിലധികം ഗ്രീന്‍ കാര്‍ഡ് അപേക്ഷകളായിരുന്നു ലഭിച്ചു കൊണ്ടിരുന്നത്. എന്നാല്‍ ട്രംപ് വീണ്ടും അധികാരത്തിലെത്തിയതോടെ നിയന്ത്രണങ്ങള്‍ കൂടുതല്‍ ശക്തമാക്കിയിട്ടുണ്ട്.
