കൊക്കെയ്ൻ ക്യാപ്സൂൾ 80 എണ്ണം വിഴുങ്ങി; ബ്രസീലിയൻ ദമ്പതികൾ നെടുമ്പാശ്ശേരിയിൽ പിടിയിലായി
കൊക്കെയ്ൻ ക്യാപ്സൂൾ വിഴുങ്ങിയ നിലയിൽ ദമ്പതികൾ അറസ്റ്റിൽ. നെടുമ്പാശ്ശേരിയിൽ എത്തിയ ബ്രസീലിയൻ ദമ്പതികളാണ് പിടിയിലായത്. ഡിആർഐ കൊച്ചി യൂണിറ്റാണ് ഇരുവരെയും കസ്റ്റഡിയിലെടുത്തത്. 80 ക്യാപ്സൂളുകള്‍ ഇരുവരുടെയും ശരീരത്തിൽ കണ്ടെത്തിയിട്ടുണ്ട്. ഇതു പുറത്തെടുക്കുന്നതിനായി രണ്ടുപേരെയും അങ്കമാലിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. നെടുമ്പാശേരിയില്‍ വിമാനമിറങ്ങിയ ശേഷം ലഹരിക്കടത്ത് സംശയത്തിന്റെ പേരിൽ ഡിആർഐ സംഘം ഇവരെ വിശദമായി പരിശോധിച്ചിരുന്നു
രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന. എന്നാൽ ശരീരത്തിലോ ബാഗുകളിലോ ഒന്നും ഒളിപ്പിച്ചതായി കണ്ടെത്താനായില്ല. തുടർന്ന് നടത്തിയ സ്കാനിങ്ങിലാണ് വിഴുങ്ങിയ നിലയിൽ ക്യാപ്സൂളുകൾ കണ്ടെത്തിയത്. ബ്രസീലിലെ സാവോപോളോയിൽ നിന്നാണ് ഇവർ കൊച്ചിയിൽ എത്തിയത്. രാവിലെ 8.45 നെടുമ്പാശ്ശേരിയിൽ എത്തിയപ്പോഴാണ് ഇരുവരും പിടിയിലായത്. തിരുവനന്തപുരത്തെ ഹോട്ടലിലേക്ക് ആയിരുന്നു ഇവര്‍ താമസിക്കാന്‍ ടിക്കറ്റ് ബുക്ക് ചെയ്തത്.
