അച്ഛനെ കൊന്നത് അമ്മയെന്ന് ജ്യോത്സ്യൻ പറഞ്ഞു; മകൾ അമ്മയെ കൊലപ്പെടുത്തി; സംഭവം തുംകൂരുവിൽ

കർണാടകയിലെ തുംകുരു ജില്ലയിലാണ് ഞെട്ടിക്കുന്ന സംഭവം അരങ്ങേറിയത്. 

33 വയസ്സുള്ള സുചിത്രയാണ് 55 വയസ്സുള്ള അമ്മ പുഷ്പാവതിയെ തലയിണ വെച്ച് ശ്വാസം മുട്ടിച്ച് കൊലപ്പെടുത്തിയത്.

അച്ഛന്റെ മരണത്തിന് കാരണം അമ്മയുടെ മന്ത്രവാദമാണെന്ന് പറഞ്ഞതാണ് കൊലപാതകത്തിന് പിന്നിലെന്ന് പറയുന്നു.

സുചിത്ര ഭർത്താവുമൊത്ത് തുംകൂരു നഗരത്തിലാണ് താമസിച്ചിരുന്നത്. ഏകദേശം ഒന്നര വർഷം മുൻപാണ് സുചിത്രയുടെ അച്ഛൻ മരിച്ചത്.

ഇതിന് ശേഷം മകൾ ജ്യോത്സ്യനെ കണ്ടപ്പോൾ, അമ്മയാണ് മന്ത്രവാദത്തിലൂലൂടെ അച്ഛനെ കൊന്നതെന്ന് ജ്യോത്സ്യൻ പറഞ്ഞതായി സുചിത്ര പറയുന്നു.

ഈ വാക്കുകൾ വിശ്വസിച്ച സുചിത്രയ്ക്ക് അമ്മയോട് വെറുപ്പ് തോന്നി. തുടർന്ന് അവർ കൊലപാതകം ആസൂത്രണം ചെയ്യുകയും ചെയ്തു.

സംഭവം നടന്ന ദിവസം രാത്രി അമ്മ ഉറങ്ങിക്കിടക്കുമ്പോൾ സുചിത്ര തലയിണ വെച്ച് ശ്വാസം മുട്ടിച്ച് കൊലപ്പെടുത്തുകയായിരുന്നു.

പിന്നീട് മരണം സ്വാഭാവിക മരണമായി തോന്നിക്കാൻ ശ്രമം നടത്തിയതായും പോലീസ് പറഞ്ഞു. വേഗത്തിൽ തന്നെ സംസ്കാര ചടങ്ങുകൾക്ക് മകൾ തയ്യാറെടുത്തു. എന്നാൽ ഈ വേഗത ശ്രദ്ധിച്ച നാട്ടുകാർക്ക് സംശയം തോന്നി.

നാട്ടുകാർ പോലീസിൽ വിവരമറിയിച്ചു.പോലീസ് സ്ഥലത്തെത്തി. പ്രാഥമിക ചോദ്യം ചെയ്യലിൽ തന്നെ സുചിത്ര കുറ്റം സമ്മതിച്ചു.

കയ്യാത്ര സ്റ്റേഷൻ പോലീസ് കൊലപാതകത്തിന് കേസെടുത്തിട്ടുണ്ട്.

കേസിൽ കൂടുതൽ അന്വേഷണം നടക്കുന്നുണ്ട്. സുചിത്രയുടെ ഭർത്താവിനെയും പോലീസ് ചോദ്യം ചെയ്യുന്നുണ്ട്. മന്ത്രവാദവുമായി ബന്ധപ്പെട്ട അക്രമങ്ങൾ കർണാടകയിൽ സാധാരണമാണ്.

പലയിടങ്ങളിലും ഇപ്പോഴും നരബലി നടക്കുന്നുണ്ട്. അടുത്തിടെ ഇത്തരമൊരു സംഭവം പിടികൂടിയിരുന്നു. ഒരു ചെറിയ കുട്ടിയെ തട്ടിക്കൊണ്ടു വന്ന് ബലി നടത്തുന്നതാണ് പിടികൂടിയത്. നാട്ടുകാർ ഒരു വീട്ടിനു പരിസരത്ത് കുഴിയും പൂജാദ്രവ്യങ്ങളും കണ്ടതിനെ തുടർന്ന് പോലീസിൽ വിവരം അറിയിക്കുകയായിരുന്നു. തുടർന്ന് അതിവേഗം പോലീസ് എത്തുകയും കുറ്റവാളികളെ പിടികൂടുകയും ചെയ്തു.

സംഭവത്തിൽ കുഞ്ഞിനെ ജീവനോടെ രക്ഷിക്കാനായി. ചെറിയ കുഞ്ഞുങ്ങളാണ് ഇത്തരം കേസുകളിൽ അധികവും ഇരകളാവുന്നത്. മൃഗങ്ങളെ കൊലപ്പെടുത്തിയുള്ള ബലികളും ബെംഗളൂരുവിലും കർണാടകയുടെ പല ഭാഗങ്ങളിലും നടക്കാറുണ്ട്.

വളർത്തുനായയെ കൊലപ്പെടുത്തി നടത്തിയ ഒരു സംഭവം അടുത്തിടെ ബെംഗളൂരുവിൽ നടന്നിരുന്നു. ഈ സംഭവം പോലീസ് കേസാവുകയും, മന്ത്രവാദം നടത്തിയ യുവതി പിടിയിലാവുകയും ചെയ്തിരുന്നു.