പത്തനംതിട്ട ജില്ലയില്‍ ഇന്ന് രാത്രി മിന്നല്‍ പ്രളയത്തിന് സാധ്യത: അതീവ ജാഗ്രത വേണമെന്ന് മന്ത്രി പി സി വിഷ്ണുനാഥ്

പത്തനംതിട്ട: പത്തനംതിട്ട ജില്ലയില്‍ രാത്രിയില്‍ അതിതീവ്ര മഴയും മിന്നല്‍ പ്രളയ സാധ്യതയുമെന്ന് മന്ത്രി പി സി വിഷ്ണുനാഥ്. ഈ സാഹചര്യത്തില്‍ ജനങ്ങള്‍ ജാഗ്രത പാലിക്കണം. നദീതീരങ്ങളില്‍ താമസിക്കുന്നവരെ ദുരന്തസാധ്യത വിലയിരുത്തി ദുരിതാശ്വാസ ക്യാമ്പുകളിലേക്ക് മാറ്റി പാര്‍പ്പിക്കും. ഇതിനായി ആവശ്യമായ പ്രചാരണം നല്‍കും. ഉരുള്‍പൊട്ടല്‍, മണ്ണിടിച്ചില്‍ സാധ്യതയുണ്ടെന്ന് കണ്ടെത്തിയ പ്രദേശങ്ങളില്‍ അടിയന്തര ക്യാമ്പുകള്‍ സജ്ജമാക്കി ജനങ്ങളെ മുന്‍കരുതലിന്റെ ഭാഗമായി മാറ്റി പാര്‍പ്പിക്കുന്നതിനുള്ള നടപടി ബന്ധപ്പെട്ട പഞ്ചായത്ത് സെക്രട്ടറിമാരും വില്ലേജ് ഓഫീസര്‍മാരും സ്വീകരിക്കും.

 ജില്ലയില്‍ 95 ദുരിതാശ്വാസ ക്യാമ്പുകളിലായി 1076 കുടുംബങ്ങളിലെ 3568 പേര്‍ നിലവിലുണ്ട്. തിരുവല്ല താലൂക്കിലാണ് ഏറ്റവും കൂടുതല്‍ ക്യാമ്പുകള്‍, 47 എണ്ണം. കോഴഞ്ചേരി 18, കോന്നി അഞ്ച്, റാന്നി ഒമ്പത്, മല്ലപ്പള്ളി 16 എന്നിങ്ങനെയാണ് മറ്റു താലൂക്കുകളിലെ കണക്ക്. ദുരിതാശ്വാസ ക്യാമ്പുകളില്‍ താമസിക്കുന്നവരുടെ സുരക്ഷിതത്വം മന്ത്രി പി സി വിഷ്ണുനാഥിന്റെ നേതൃത്വത്തില്‍ വിലയിരുത്തി.