10 മാസം മാത്രം; പ്രായം കുറഞ്ഞ അവയവദാതാവ്

റോഡപകടത്തിൽ ജീവൻ പൊലിഞ്ഞ 10 മാസം പ്രായമുള്ള കുഞ്ഞ് നാലുപേർക്ക് പുതുജീവനേകും. പത്തനംതിട്ട മല്ലപ്പള്ളി സ്വദേശികളുടെ മകളായ ആലിൻ ഷെറിൻ എബ്രഹാമിൻ്റെ അവയവങ്ങളാണ് ദാനം ചെയ്യുന്നത്. സംസ്ഥാനത്ത ഏറ്റവും പ്രായം കുറഞ്ഞ അവയവദാതാവാണ് ആലിൻ.

സമയം മലയാളം റിപ്പോർട്ട് ചെയ്യുന്നു.

റോഡപകടത്തിൽ ഗുരുതര പരിക്കേറ്റ് കൊച്ചിയിലെ അമൃത ആശുപത്രിയിൽ ചികിത്സയിലിരിക്കെ ആലിന് മസ്തിഷ്ക മരണം സംഭവിക്കുകയായിരുന്നു.

തുടർന്ന് മാതാപിതാക്കളാണ് അവയവദാനത്തിന് സന്നദ്ധത അറിയിച്ചത്. രണ്ട് വൃക്കകൾ തിരുവനന്തപുരം മെഡിക്കൽ കോളേജ് എസ്എടി ആശുപത്രിയിൽ ചികിത്സയിലുള്ള 10 വയസ്സുള്ള കുട്ടിക്ക് നൽകും.

കിംസ് ആശുപത്രിയിൽ ചികിത്സയിൽ കഴിയുന്ന ആറ് മാസം പ്രായമുള്ള കുഞ്ഞിന് കരളും എഐടി ആശുപത്രിയിൽ ചികിത്സയിൽ കഴിയുന്ന കുട്ടിക്ക് ഹൃദയ വാൽവും അമൃത ആശുപത്രിയിൽ നേത്രപടലങ്ങളും ദാനം ചെയ്യും.

ഫെബ്രുവരി അഞ്ചിന് ആലിനും മാതാവും മാതാവിൻ്റെ രക്ഷിതാക്കളും കാറിൽ യാത്ര ചെയ്യവെ എതിർദിശയിൽ വന്ന വാഹനം ഇടിക്കുകയായിരുന്നു. അപകടത്തിൽ ആലിന് തൽക്ഷണം ബോധം നഷ്ടപ്പെട്ടിരുന്നു. കുഞ്ഞിൻ്റെ അമ്മയ്ക്കും അമ്മയുടെ മാതാപിതാക്കൾക്കും പരിക്കേറ്റിരുന്നു.

ആദ്യം ചങ്ങനാശേരിയിലെ ഗവ. ജനറൽ ആശുപത്രിയിലും പിന്നീട് തിരുവല്ലയിലെ ആശുപത്രിയിലും പ്രവേശിപ്പിച്ചു. ഫെബ്രുവരി ആറിനാണ് കൊച്ചിയിലെ അമൃത ആശുപത്രിയിലേക്ക് മാറ്റിയത്. തുടർന്ന് വെൻ്റിലേറ്ററിൻ്റെ സഹായത്തോടെ ചികിത്സ തുടരുകയായിരുന്നു.