യു.എസുമായി പുതിയ കരാർ: യുറേനിയം ശേഖരം ഉപേക്ഷിക്കാൻ ഇറാൻ സമ്മതിച്ചതായി റിപ്പോർട്ട്

ഒന്നിലധികം ആണവായുധങ്ങൾ നിർമ്മിക്കാൻ ആവശ്യമായ അളവിലുള്ള സമ്പുഷ്ടീകരിച്ച യുറേനിയം ശേഖരം ഉപേക്ഷിക്കാമെന്ന് ഇറാൻ സമ്മതിച്ചതായാണ് റിപ്പോർട്ടുകൾ. ചർച്ചകളിൽ ഏറ്റവും വലിയ തർക്കവിഷയമായി നിലനിന്നിരുന്ന ഒന്നായിരുന്നു ഇറാന്റെ യുറേനിയം ശേഖരം. യുറേനിയം ശേഖരം വിട്ടുകൊടുക്കാൻ ഇറാൻ തത്വത്തിൽ സമ്മതിച്ചതായി പേര് വെളിപ്പെടുത്താത്ത രണ്ട് അമേരിക്കൻ ഉദ്യോഗസ്ഥർ സ്ഥിരീകരിച്ചിട്ടുണ്ട്. എന്നാൽ ഈ യുറേനിയം എങ്ങനെ ഒഴിവാക്കും അല്ലെങ്കിൽ എവിടേക്ക് മാറ്റും എന്നതിനെക്കുറിച്ചുള്ള കൃത്യമായ നടപടിക്രമങ്ങൾ വരും ചർച്ചകളിൽ മാത്രമായിരിക്കും തീരുമാനിക്കുക.

ഇറാന്റെ സമ്പുഷ്ടീകരിച്ച യുറേനിയം ശേഖരത്തെ അമേരിക്കൻ പ്രസിഡന്റ് ഡൊണാൾഡ് ട്രംപ് 'ആണവപ്പൊടി' (nuclear dust) എന്നാണ് പലപ്പോഴും വിശേഷിപ്പിക്കാറുള്ളത്. ഇറാൻ ആണവായുധങ്ങൾ സ്വന്തമാക്കുന്നത് തടയുക എന്നത് ഈ സംഘർഷത്തിലെ പ്രധാന ലക്ഷ്യങ്ങളിലൊന്നായി ട്രംപ് നിലനിർത്തിയിരുന്നു. യുറേനിയം വിഷയത്തിൽ വിട്ടുവീഴ്ചയ്ക്ക് തയ്യാറായില്ലെങ്കിൽ സൈനികാക്രമണങ്ങൾ പുനരാരംഭിക്കുമെന്ന് അമേരിക്കൻ ഉദ്യോഗസ്ഥർ ഇറാനു മുന്നറിയിപ്പ് നൽകിയിരുന്നതായും റിപ്പോർട്ടിൽ പറയുന്നുണ്ട്.

ആണവായുധങ്ങൾ നിർമ്മിക്കില്ലെന്ന ഉറപ്പും, യുറേനിയം സമ്പുഷ്ടീകരണം നിർത്തിവെക്കുന്നതിനെക്കുറിച്ചുള്ള ചർച്ചകളും, നിലവിലുള്ള ശേഖരം ഒഴിവാക്കലും ഉൾപ്പെടുന്ന ഒരു കരട് രൂപരേഖയാണ് നിലവിൽ ചർച്ച ചെയ്യപ്പെടുന്നതെന്ന് റോയിട്ടേഴ്‌സ് റിപ്പോർട്ട് ചെയ്തു.