മാതൃസുരക്ഷ: കവിത, എം തങ്കച്ചൻ ജോസഫ്

മാതൃഭാവം നിഴലിടും നിന്നുദരത്തിലൊരു

പുതുജീവനുരുവായിടുന്നു

കരുതലേകുവാൻ കഴിയണം ഇനി

നിറവയറിന്റെയീ തനുവിനെയും.

ഒരു കുഞ്ഞുപൂവാകുമിളംമനസ്സിന്റെ

നിറപുഞ്ചിരി ഞാനെത്ര കാത്തു!

അരുമയോടെത്തഴുകിയ കിനാവുകൾ

സഫലമാകുവാൻ

ഒരുമയോടൊഴുകി നാമൊരു മൃദുലരാഗത്തിൻഗീതമായി..

മർത്ത്യകുലത്തിന്റെയാത്മദുഃഖങ്ങൾക്ക്

സ്വർഗീയസമ്മാനസാന്ത്വനങ്ങൾ

ഭൂമിയിൽ സന്താനസൗഭാഗ്യ-

കുസുമങ്ങളായ്..

അവയെ വഹിക്കും മാതൃഭാവങ്ങളെ

സൂക്ഷ്മതയോടെന്നും കരുതിടേണം 

'അമ്മമനമൊന്നിടറിക്കലങ്ങിയാൽ

കുഞ്ഞുഹൃദയം തപിച്ചിടുന്നു

ആനന്ദചിത്തയാം 'അമ്മതൻമനമെങ്കിൽ

അരുമയാം കുഞ്ഞിന്റെ പുഞ്ചിരിപ്പൂമുഖം

ദിവ്യപ്രകാശമായിമാറിടുന്നു..